Қашқадарё вилоятида GTL (gas to liquid) технологияси асосида сунъий ёқилғи ишлаб чиқариш заводини 2021 йил август ойида ишга тушириш режалаштирилмоқда. Бу ҳақдаги маълумотлар «Ўзбекнефтгаз» компаниясининг халқаро саноат кўргазмасидаги стендига тақдим этилди, деб ёзади «Gazeta.uz».
Холдинг маълумотларига кўра, апрелда заводда газни синтез қилиш ускунаси, май ойида тайёр маҳсулотлар ишлаб чиқариш ускунаси, июнда ҳавони ажратиш қурилмаси ишга туширилади, августда эса маҳсулотларни ишлаб чиқариш бошланади.
«Ўзбекнефтгаз» вакили заводдаги ишлаб чиқаришни бошлаш муддатлари COVID-19 коронавируси пандемияси сабабли ўзгарганини таъкидлаган.
Кўргазмага тақдим этилган «Ўзбекнефтгаз» маълумотларига кўра, заводда йилига 3,6 миллиард куб метр газ қайта ишланиб, 724 минг тонна дизель ёқилғиси, 307 минг тонна авиакеросин, 437 минг тонна нафт (нефтни ҳайдашдан олинадиган модда) ва 53 минг тонна сиқилган газ ишлаб чиқарилади.
Заводнинг технологик қисми Жанубий Кореянинг Hyundai Engineering & Construction компанияси томонидан барпо этилган бўлса, Жанубий Африканинг Sasol компанияси маҳсулотлар лицензиари, Даниянинг Haldor Topsoe компанияси эса синтез газ ишлаб чиқариш технологияларининг етказиб берувчиси саналади. Лойиҳанинг умумий қиймати 3,6 миллиард долларни ташкил этиб, унинг 1,3 миллиард доллари «Ўзбекнефтгаз»нинг шахсий ресурслари, 2,3 миллиард доллари эса «Газпромбанк», «Росексимбанк» ва Россия экспорт кредитлари суғуртаси агентлигини ўз ичига олган халқаро молиявий консорсиум маблағлари ҳисобланади.
Аввалроқ Ўзбекистонда 2021 йилда 226 та объект, шу жумладан, GTL заводи ишга туширилиши тўғрисида хабар берилганди.
Изоҳ (0)