O‘zbekistonning 726 ta mahallasida ayollar, bolalar va uy xo‘jaliklarining ijtimoiy-iqtisodiy farovonligi to‘g‘risida muhim ma’lumotlarni yig‘ish boshlandi. Bu haqda “Gazeta.uz” ma’lum qildi.
YuNISEFning Toshkentdagi vakolatxonasining ma’lum qilishicha, ushbu tadqiqot uy xo‘jaliklari bilan so‘rovnoma o‘tkazishga asoslangan Multiindikator klaster kuzatuvlari bo‘lib, MICS deb ataladi. Ma’lumotlarni yig‘ish 5-apreldan boshlangan bo‘lib, 31-iyulgacha davom etadi. Hukumat va MICS doirasida hamkorlik qilayotgan tashkilotlar aholini “ma’lumotlarni yig‘ayotgan tadqiqotchilar uchun o‘z uylarining eshiklarini ochishga” chaqirgan.
To‘plangan ma’lumotlar va ko‘rsatkichlar ijtimoiy xizmatlar sohasida qarorlar qabul qilish, milliy siyosatni, rivojlanish va xizmat ko‘rsatish dasturlarini ishlab chiqish va amalga oshirish uchun zarur. U, shuningdek, O‘zbekistonning barqaror rivojlanish maqsadlariga erishish yo‘lidagi taraqqiyotini kuzatish uchun muhim bo‘lib, xalqaro ma’lumotlar bazalariga kiritiladi.
So‘nggi yigirma yil ichida 100 dan ortiq mamlakatda 300 dan ortiq MICS tadqiqotlari o‘tkazilgan. Ular bolalar va ayollar farovonligining asosiy ko‘rsatkichlari to‘g‘risidagi ma’lumotlarni taqdim etish va ularning hayotini yaxshilashga qaratilgan siyosatni shakllantirishga yordam bergan.
MICS Davlat statistika qo‘mitasi va YuNISEF tomonidan amalga oshirilmoqda. MICS bundan avval O‘zbekistonda 2006-yilda o‘tkazilgan.
Izoh (0)