Bentley kompaniyasi Mayamida o‘zining birinchi Bentley Residences osmono‘par turar joy binosini quradi. 200 ta kvartiradan iborat majmua Atlantika okeani qirg‘og‘idagi Sanni-Ayls-Bich shahrida paydo bo‘ladi, deb yozadi Motor.
Bentley — o‘zini ko‘chmas mulk sohasida sinab ko‘rishni istagan birinchi ishlab chiqaruvchi emas, oldinroq Aston Martin shu kabi tashabbus bilan chiqqan. Kompaniyaning hatto bir nechta qiziqarli loyihalari bor: bu Mayamidagi Aston Martin Residences minorasi, Manxettendagi 130 William turar joy majmuasi va undan ikki soatli yo‘l uzoqligidagi Sklvan Rock majmuasi. Bentley esa Dezer Development qurilish kompaniyasi va Sieger Suarez Architects arxitektura studiyasi bilan hamkorlikda 60 qavatli osmono‘parni qurish niyatida.
Binoning dizayn-loyihasi mahalliy Florida Green Building Council (FLGC) tabiatni qo‘riqlash tashkiloti bilan kelishib olingan. Qurilishda faqat ekologik xavfsiz materiallardan foydalaniladi, qirilib ketish xavfi ostida bo‘lgan dengiz toshbaqalarini himoya qilish maqsadida haddan ortiq yoritish tizimidan voz kechiladi va osmono‘par bino elektr energiyasini kam sarflaydigan holda loyihalanadi.
Bentley Residences’da panorama oynalar bilan jihozlangan 200 ta xonadon bo‘ladi. Har bir xona alohida terassa, basseyn, sauna va ko‘cha dushiga ega bo‘ladi. Eng muhimi — bu bir necha avtomobilga mo‘ljallangan garaj va ularni ko‘tarishga xizmat qiladigan patentlangan lift. Shuningdek, kvartira xaridorlari ixtiyorida mashg‘ulotlar zali, kinoteatr, spa-markaz, viski-bar va restoran ham bo‘ladi. Bularning barchasiga bonus sifatida okeanning ajoyib ko‘rinishdan bahramand bo‘lish mumkin.
Bentley Residences qurilishi 2023-yilda boshlanadi. Yakunlanish muddati — 2026-yil. Kvartiralar narxi noma’lum, biroq Aston Martin Residences minorasidagi xonadonlar narxi 600 mingdan 50 million dollargacha.
Avvalroq Singapurda 42 ming uyga mo‘ljallangan ekoshahar qurilishi va ilk uylar 2023-yildan foydalanishga topshirilishi kutilayotgani to‘g‘risida xabar berilgandi.
Mavzuga doir: Germaniyada avtomobillar kiritilmaydigan shahar quriladi
Izoh (0)