Сочи шаҳрининг Эсто-садок посёлкасида 20 миллион рубль (257 минг доллар) турадиган Lamborghini Urus кроссовери аварияга учради. Жабрланганлар йўқ, бироқ қимматбаҳо кроссоверга жиддий шикаст етган, деб ёзади Motor.
Йўл ҳаракати хавфсизлик хизмати маълумотларига кўра, ЙТҲ ёмғирли об-ҳаво сабаб юзага келган: ҳайдовчи хавфсиз ҳаракатланиш тезлигини эплай олмаган ва сирпанчиқ йўлда бошқарувни йўқотган. Оқибатда кроссовер йўл четидаги тўсиққа олд ўнг ғилдираги билан урилган. Бундан ташқари, ўнг фара ва бамперга синган, капот ва қанот пачақ бўлган.
Telegram’даги Mash каналининг ёзишича, аварияга учраган Uris қиммат автомобилларни ижарага бериш билан шуғулланувчи DayDream компаниясининг эгаси Мирослава Тихановага тегишли. Кўнгилсиз ҳодиса вақтида Lamborghini рулида Тиханованинг ўзи бўлганми ёки компания мижози бунга ойдинлик киритилмаган.
Маълум қилинишича, аварияга учраган Lamborghini Urus — Сочидаги компания автопаркидан ўрин олган энг қиммат автомобиль эмас. Масалан, улар Rolls-Royce Dawn, Lamborghini Huracan Evo ва McLaren 650S’ни ҳам ижарага беради.
Урус номи остидаги биринчи Lamborghini 2017 йилнинг декабрида тақдим этилган. Машинага 650 от кучига эга тўрт литрли V8 битурбомотори ўрнатилган бўлиб, у соатига 100 километр тезликка 3,6 сонияда эришади. Максимал тезлиги — 305 километр/соат.
Аввалроқ канадалик эркак ижарага олинган Lamborghini Urus’ни қайтармасликка қарор қилгани тўғрисида хабар берилганди.
Изоҳ (0)