Singapurda 42 ming uyga mo‘ljallangan ekoshahar quriladi. Ilk uylar 2023-yildan foydalanishga topshirilishi kutilmoqda

Singapurda Tengax (malaychada — “oraliq”) nomli kelajak ekoshahri quriladi. Unda joylashgan kvartiralar narxi 81 ming dollardan boshlanadi, ilk uylar esa 2023-yilda foydalanishga topshiriladi, deb xabar beradi Esquire.

42 ming uyga mo‘ljallangan Tengax ekoshahri beshta tumanni qamrab olib (plantatsiya, bog‘, park, “g‘ishtli” tuman va o‘rmon tepaligi), Singapur hukumati tomonidan Ikkinchi jahon urushidan so‘ng, qurilgan 24-manzilgohga aylanadi. Biroq loyiha saytida ta’kidlanishicha, u mamlaktadagi birinchi “aqlli” ekoshaharga aylanadi.

Yangi shaharning asosiy o‘ziga xos jihatlari:

• issiqlik konsentratsiyasini maksimal darajada kamaytirgan holda shaharni qurishga imkon beradigan “aqlli” loyiha;
• energiya ta’minotini optimallashtiruvchi tizim — uning bir qismi shahar aholisi uchun energiya va suvdan foydalanishni nazorat qilish imkonini beruvchi dastur;
• “aqlli” yoritish tizimi — faqatgina odamlar joylashgan hududlarda ishga tushadi;
• chiqindilarni yig‘ishning vakuum tizimi — yerosti trubalari orqali chiqindilarni yig‘ish va tashish imkonini beradi;
• elektromobillar uchun quvvatlantirish stansiyalari;
• uylarga o‘rnatiladigan raqamli displeylar — aholini ularning atrof-muhitga kollektiv ta’siri haqida ma’lumot berib turadi;
• konditsioner tizimi — ma’lum hududlardagi uylarning haroratini boshqarish imkonini beradi.

Loyiha mualliflarining g‘oyasiga ko‘ra, avtomobil va temiryo‘llar yer ostidan o‘tkazilib, piyodalar uchun qo‘shimcha zonalar yaratiladi.

Avvallari qurilish joyida g‘isht ishlab chiqarish fabrikasi joylashgan bo‘lgan, biroq so‘nggi yillarda 700 gektar keladigan mazkur hududda o‘rmon bunyod etilgan. Shuningdek, uning markazidan yovvoyi hayvonlarning xavfsiz o‘tishini ta’minlaydigan ekologik “koridor” ham o‘tkaziladi.

Bu kabi qurilishni amalga oshirish Singapur hukumati uchun 2030-yilga borib atmosferaga karbonat angidrid gazini chiqarishni kamaytirish, 2050-yilga borib esa uni ikki barobar qisqartirish imkonini beradi.

Avvalroq Germaniyada avtomobillar kiritilmaydigan shahar qurilishi to‘g‘risida xabar berilgandi.