Андижон ва Наманган вилоятлари аҳолиси 6 апрель, сешанба куни кечқурун Ўзбекистон осмонида ёрқин чақноққа гувоҳ бўлди. Ҳодиса акс этган видеоёзувлар маҳаллий Telegram-каналларда тарқалди.
Худди шу ҳодиса, «24.kg»нинг ёзишича, Қирғизистон осмонида ҳам кузатилган, Бишкек ва Чуй вилояти аҳолиси номаълум объектнинг қулаганига эътибор қаратган.
Ўзбекистон Фанлар академиясининг Улуғбек номидаги Астрономия институти директори ўринбосари Юсуфжон Тиллаев ҳодиса юзасидан «Gazeta.uz»га изоҳ берди.
«Икки тахмин бор. Биринчиси — бу космик чиқинди, космик кеманинг ўз вазифасини бажариб бўлган қисми. Иккинчи тахминга кўра, бу — космик жисм, астероид парчаси бўлиб, кеча болид кўринишида намоён бўлди», — деган Юсуфжон Тиллаев.
Директор ўринбосари айни пайтда институт мутахассислари мазкур ҳодиса сабабларини ўрганиш устида иш олиб бораётганини маълум қилган. «Умид қиламанки, тез орада биз унинг нима эканини аниқлаймиз», — дея қўшимча қилди олим.
Фавқулодда вазиятлар вазирлиги матбуот хизмати осмондан объект тушиши билан боғлиқ қандайдир вайронагарчиликлар тўғрисида ахборот келиб тушмаганини билдирган.
Эслатиб ўтамиз, 2019 йил 26 июль оқшомида ўзбекистонлик ва қозоғистонлик интернет фойдаланувчилари ижтимоий тармоқларга тунги осмонда кузатилган чақнаш акс этган видеороликларни юклаганди. Ўзбекистонда самодаги бундай ҳодисани Самарқанд, Бухоро, Тошкент шаҳарларида кузатиш мумкин бўлган. Ўзбекистон осмонида кўринган ушбу номаълум жисм «Топол» қитъалараро баллистик ракетаси бўлиши мумкинлиги тахмин қилинган.
Изоҳ (0)