Қўқон шаҳри ҳокими Маъруфжон Усмонов «2-Шалдирамоқ» маҳалласида яшовчи ижтимоий муҳофазага муҳтож фуқаронинг ҳолидан хабар олиб, қурилиш ишларида иштирок этди. Бу ҳақда «Дарё» мухбири хабар берди.
Маълум қилинишича, шаҳарнинг Бахмалбоп кўчаси, 57-хонадонида яшовчи Ҳасан Солиевнинг оиласи ижтимоий оғир аҳволдаги хонадонлар рўйхатига киритилиб, хонадонини ҳомийлар ҳисобидан қайта қуриб бериш режалаштирилган. Айни вақтда бу ерда бир уй, бир даҳлиз ва ошхона қурилиши бошлаб юборилган.
Аввалроқ Қўқон ҳокими мазкур хонадонда бўлиб, девор ва дарахтларни оқлагани ҳақида хабар берилган эди.
Бу сафар Маъруфжон Усмонов қурилиш ишларида иштирок этиб, янги уйнинг деворига ғишт терган.
Қайд этилишича, 2021 йил давомида Қўқон шаҳрида 22 нафар эҳтиёжманд оиланинг уйлари қайта қуриб берилган. Бугунги кунда ижтимоий муҳофазага муҳтож яна 30 нафар фуқаронинг хонадонида қурилиш ишлари бошланган.
Маъруфжон Усмонов, шунингдек, шаҳарнинг Туркистон кўчасидаги ободонлаштириш ишларида ҳам қатнашиб, манзарали дарахт ва буталар эккан. Таъкидланишича, Қўқон шаҳрида 150 мингта дарахт экилади. Шу мақсадда Россиядан ҳомийлар ҳисобидан 20 мингдан зиёд манзарали дарахт кўчатлари келтирилган.
Мавзуга доир: Фото: Девор ва дарахт оқлаётган Қўқон ҳокими
Изоҳ (0)