Ўзбекистонда 2021 йил бошидан буён божхоначилар ҳуқуқни муҳофаза қилувчи бошқа идоралар вакиллари билан ҳамкорликда оғирлиги 65 килограммдан ортиқ гиёҳвандлик воситаларининг ноқонуний айланмасига чек қўйди. Бу ҳақда Давлат божхона қўмитаси матбуот хизмати маълум қилди.
Хусусан, Давлат божхона қўмитасининг Тошкент шаҳар божхона бошқармаси Контрабандага қарши курашиш ва божхона аудити бўлими ходимлари томонидан ДХХ вакиллари билан ҳамкорликда Тошкентнинг Сергели туманида тезкор тадбир ўтказилган.
Тезкор тадбирда аввалдан кузатувга олинган фуқаро Р.T. бошқарувидаги Matiz тўхтатилиб, кўздан кечирилганда йўловчи сифатида кетаётган А.Д.га тегишли бўлган бир дона қути борлиги, унинг ичида 5 дона скотчланган ўрамда жами оғирлиги 6,8 килограммдан ортиқ бўлган опий ва гашиш гиёҳвандлик воситалари яширилганлиги аниқланган.
Мазкур ҳолат юзасидан божхона органлари томонидан жиноят иши қўзғатилган.
Бундан аввал Тошкентда қарийб 100 миллион сўмлик кучли таъсир қилувчи дори воситаларининг ноқонуний айланмасига чек қўйилгани, Фарғонада уйида гиёҳванд модда сақлаб келган шахсга нисбатан жиноят иши қўзғатилгани ҳамда Андижонда гиёҳванд моддаларни оёқ кийимга яшириб ўтмоқчи бўлганлар қўлга тушгани ҳақида хабар берилганди.
Изоҳ (0)