Черногорияда Сребреница геноциди ҳақидаги гаплари учун адлия вазирининг истеъфоси талаб қилинмоқда

Черногория бош вазири Здравко Кривокапич 1992—1995 йиллардаги фуқаролар уруши даврида Сребреницадаги воқеалар ҳақидаги баёноти туфайли адлия, инсон ҳуқуқлари ва озчилик миллатлар ҳуқуқлари вазири Владимир Лепосавичнинг истеъфосини талаб қилди. Бу ҳақда бош вазирнинг халққа фавқулодда мурожаатига таяниб «ТАСС» хабар берди.

«Ушбу ваколатлар даражасида адлия вазири билдирган ўзига хос шахсий фикрларни қабул қилиб бўлмайди. Бугун умумий йиғилишда жамоа фаолиятини таъминлашни истаб, мен бешта саволни ўртага ташладим. Вазир Лепосавич ҳукуматдан ва бизнинг вазифаларимиздан афзалроқ бўлиши мумкинми, деган маънодаги савол ҳам улар орасида бор», — дея адлия вазирининг парламент томонидан илгари қабул қилинган Сребреница масаласида мамлакатнинг расмий позициясига қўшилмаслигини таъкидлаган Кривокапич.

«Лепосавичнинг баёноти ҳукуматни ичкаридан ағдаришга уринишдир», — дея қўшимча қилган бош вазир.

Аввалроқ Черногория адлия, инсон ҳуқуқлари ва озчилик миллатларнинг ҳуқуқлари вазири Владимир Лепосавич Сребреница воқеалари ҳақидаги саволга жавоб берар экан, Сребреницада юз берган геноцидни ҳақиқатда исботланган тақдирдагина тан олишини айтганди. Черногория бош вазири ўринбосари Дритан Абазович ҳукумат аъзолари учун бундай баёнотлар номақбул эканини қайд этди. Унинг фикрига кўра, «агар кимдир Сребреницада геноцид юз берганини англаб етмаса, унга ҳукумат лавозимларида ўрин йўқ».

Адлия вазирининг истеъфоси парламент томонидан тасдиқланиши керак. Кривокапич Лепосавични истеъфога чиқариш таклифини бугуноқ депутатларга юборишга ваъда берди.

2017 йилда НАТОга қўшилган Черногория Ғарбнинг Югославия можароси бўйича позициясини қабул қилишга мажбур. Вазият мураккаблашмоқда, чунки кўп миллатли Черногория аҳолиси ҳам можарода қатнашган ва жамиятда бу масалада ҳанузгача келишув мавжуд эмас.

Маълумот учун, ҳар йили 11 июль куни Босния ва Герцоговинада Серб Республикаси аскарлари томонидан Сребреница шаҳри аҳолиси устидан амалга оширилган қирғин қурбонлари хотирланади. Гаага халқаро трибунали Босния урушининг ушбу эпизодини «геноцид» деб баҳолаган.