Chernogoriyada Srebrenitsa genotsidi haqidagi gaplari uchun adliya vazirining iste’fosi talab qilinmoqda

Chernogoriya bosh vaziri Zdravko Krivokapich 1992—1995-yillardagi fuqarolar urushi davrida Srebrenitsadagi voqealar haqidagi bayonoti tufayli adliya, inson huquqlari va ozchilik millatlar huquqlari vaziri Vladimir Leposavichning iste’fosini talab qildi. Bu haqda bosh vazirning xalqqa favqulodda murojaatiga tayanib “TASS” xabar berdi.

“Ushbu vakolatlar darajasida adliya vaziri bildirgan o‘ziga xos shaxsiy fikrlarni qabul qilib bo‘lmaydi. Bugun umumiy yig‘ilishda jamoa faoliyatini ta’minlashni istab, men beshta savolni o‘rtaga tashladim. Vazir Leposavich hukumatdan va bizning vazifalarimizdan afzalroq bo‘lishi mumkinmi, degan ma’nodagi savol ham ular orasida bor”, — deya adliya vazirining parlament tomonidan ilgari qabul qilingan Srebrenitsa masalasida mamlakatning rasmiy pozitsiyasiga qo‘shilmasligini ta’kidlagan Krivokapich.

“Leposavichning bayonoti hukumatni ichkaridan ag‘darishga urinishdir”, — deya qo‘shimcha qilgan bosh vazir.

Avvalroq Chernogoriya adliya, inson huquqlari va ozchilik millatlarning huquqlari vaziri Vladimir Leposavich Srebrenitsa voqealari haqidagi savolga javob berar ekan, Srebrenitsada yuz bergan genotsidni haqiqatda isbotlangan taqdirdagina tan olishini aytgandi. Chernogoriya bosh vaziri o‘rinbosari Dritan Abazovich hukumat a’zolari uchun bunday bayonotlar nomaqbul ekanini qayd etdi. Uning fikriga ko‘ra, “agar kimdir Srebrenitsada genotsid yuz berganini anglab yetmasa, unga hukumat lavozimlarida o‘rin yo‘q”.

Adliya vazirining iste’fosi parlament tomonidan tasdiqlanishi kerak. Krivokapich Leposavichni iste’foga chiqarish taklifini bugunoq deputatlarga yuborishga va’da berdi.

2017-yilda NATOga qo‘shilgan Chernogoriya G‘arbning Yugoslaviya mojarosi bo‘yicha pozitsiyasini qabul qilishga majbur. Vaziyat murakkablashmoqda, chunki ko‘p millatli Chernogoriya aholisi ham mojaroda qatnashgan va jamiyatda bu masalada hanuzgacha kelishuv mavjud emas.

Ma’lumot uchun, har yili 11-iyul kuni Bosniya va Gersogovinada Serb Respublikasi askarlari tomonidan Srebrenitsa shahri aholisi ustidan amalga oshirilgan qirg‘in qurbonlari xotirlanadi. Gaaga xalqaro tribunali Bosniya urushining ushbu epizodini “genotsid” deb baholagan.