Индонезиянинг шарқий қисмида ва унга қўшни бўлган Шарқий Тиморда кучли ёғингарчиликлар кетма-кет кўчки ва тошқинларни келтириб чиқарди, бунинг натижасида 52 киши қурбон бўлди. Бу ҳақда «Интерфакс» хабар берди.
Индонезиянинг Табиий офатлар оқибатларини бартараф этиш агентлигининг маълумотларига кўра, мамлакатда энг камида 41 киши қурбон бўлди, 27 киши бедарак йўқолди.
Шарқий Нуса-Тенгара провинциясининг Адонара оролидаги Ламенеле аҳоли пунктида ўнлаб уйлар кўчки остида қолди. Фавқулодда ҳолатлар бўйича маҳаллий агентлик раҳбари Ленни Оланинг хабар беришича, қутқарувчилар 35 кишининг жасадини топди ва энг камида беш киши жароҳатланди.
Оян Баян қишлоғида эса 40 та уй вайрон бўлди. Вайроналар ичида уч кишининг жасади топилди. Юзлаб аҳоли уйларини ташлаб кетишига мажбур бўлди. Байбуракда (Индонезиядаги қишлоқ номи) уч киши қурбон бўлди, етти киши бедарак йўқолди.
Оланинг маълумотларига кўра, кўчки Адонара оролидаги бешта кўприкни бузиб юборди.
Бундан ташқари, кўчкилар Дили шаҳрида (Шарқий Тимор пойтахти) 11 кишининг ўлимига сабаб бўлди.
Аввалроқ АҚШнинг Алабама ва Техас штатларида торнадо содир бўлгани ва деярли 70 минг уй электр энергиясидан узилиб қолгани ҳақида хабар берилди. Табиий офат оқибатида юзлаб уйлар зарар кўрди, дарахтлар қулади, бир нечта трасса ёпилиб қолди.
Хитой шимоли-ғарбида эса 5,4 амплитудали кучли ер силкиниши содир бўлди. Зилзила оқибатида бинолар вайрон бўлгани ва табиий офатдан кейин аҳоли орасида ҳалок бўлганлар борлиги хабар берилди. Хабарга кўра, 65 та аҳоли уйи вайронага айланган ва камида уч нафар одам ҳалок бўлган. 278 нафар фуқаро хавф эҳтимоли юқори бўлган ҳудудлардан эвакуация қилинган.
Шунингдек, Мексикада шимолий Коуэла ва Нуэво-Леон штатлари чегарасида содир бўлаётган йирик ўрмон ёнғини туфайли 1100 киши эвакуация қилинди. Табиий офат туфайли ҳалок бўлганлар ва жароҳат олганлар ҳақида маълумот берилмаган.
Мавзуга доир: Япония ва Жанубий Кореяни қум бўрони қоплади (фото)
Изоҳ (0)