Indoneziya va Sharqiy Timordagi ko‘chki va toshqinlar oqibatida 52 kishi halok bo‘ldi

Indoneziyaning sharqiy qismida va unga qo‘shni bo‘lgan Sharqiy Timorda kuchli yog‘ingarchiliklar ketma-ket ko‘chki va toshqinlarni keltirib chiqardi, buning natijasida 52 kishi qurbon bo‘ldi. Bu haqda “Interfaks” xabar berdi.

Indoneziyaning Tabiiy ofatlar oqibatlarini bartaraf etish agentligining ma’lumotlariga ko‘ra, mamlakatda eng kamida 41 kishi qurbon bo‘ldi, 27 kishi bedarak yo‘qoldi.

Sharqiy Nusa-Tengara provinsiyasining Adonara orolidagi Lamenele aholi punktida o‘nlab uylar ko‘chki ostida qoldi. Favqulodda holatlar bo‘yicha mahalliy agentlik rahbari Lenni Olaning xabar berishicha, qutqaruvchilar 35 kishining jasadini topdi va eng kamida besh kishi jarohatlandi.

Oyan Bayan qishlog‘ida esa 40 ta uy vayron bo‘ldi. Vayronalar ichida uch kishining jasadi topildi. Yuzlab aholi uylarini tashlab ketishiga majbur bo‘ldi. Bayburakda (Indoneziyadagi qishloq nomi) uch kishi qurbon bo‘ldi, yetti kishi bedarak yo‘qoldi.

Olaning ma’lumotlariga ko‘ra, ko‘chki Adonara orolidagi beshta ko‘prikni buzib yubordi.

Bundan tashqari, ko‘chkilar Dili shahrida (Sharqiy Timor poytaxti) 11 kishining o‘limiga sabab bo‘ldi.

Avvalroq AQShning Alabama va Texas shtatlarida tornado sodir bo‘lgani va deyarli 70 ming uy elektr energiyasidan uzilib qolgani haqida xabar berildi. Tabiiy ofat oqibatida yuzlab uylar zarar ko‘rdi, daraxtlar quladi, bir nechta trassa yopilib qoldi.

Xitoy shimoli-g‘arbida esa 5,4 amplitudali kuchli yer silkinishi sodir bo‘ldi. Zilzila oqibatida binolar vayron bo‘lgani va tabiiy ofatdan keyin aholi orasida halok bo‘lganlar borligi xabar berildi. Xabarga ko‘ra, 65 ta aholi uyi vayronaga aylangan va kamida uch nafar odam halok bo‘lgan. 278 nafar fuqaro xavf ehtimoli yuqori bo‘lgan hududlardan evakuatsiya qilingan.

Shuningdek, Meksikada shimoliy Kouela va Nuevo-Leon shtatlari chegarasida sodir bo‘layotgan yirik o‘rmon yong‘ini tufayli 1100 kishi evakuatsiya qilindi. Tabiiy ofat tufayli halok bo‘lganlar va jarohat olganlar haqida ma’lumot berilmagan.