Бугун,

  • USD 10940.05
  • RUB 182.26
  • EUR 11121.65

Эрон ташқи ишлар вазири Муҳаммад Жавод Зариф бошчилигидаги делегация 4 апрель куни Ўзбекистонга келгани ҳақида хабар берилган эди. ТИВ матбуот хизматининг маълум қилишича, 5 апрель куни Ўзбекистон ТИВ раҳбари Абдулазиз Комилов Эрон ТИВ раҳбари Муҳаммад Жавод Зариф билан учрашув ўтказди.

Фото: ТИВ матбуот хизмати

Фото: ТИВ матбуот хизмати

Вазирлик матбуот хизматининг хабар беришича, томонлар сиёсий, савдо-иқтисодий, транспорт-коммуникация, инвестиция, маданий-гуманитар ва бошқа соҳалардаги икки томонлама муносабатларнинг ҳолати ҳамда истиқболларини муҳокама қилди.

ТИВ раҳбарлари яқинда икки мамлакат ташқи ишлар вазирликлари ўртасида бўлиб ўтган сиёсий маслаҳатлашувлар VI даврасининг самарали натижаларини мамнуният билан қайд этиб, барча даражаларда конструктив мулоқотни давом эттириш зарурлигини таъкидлаган.

Музокараларда икки давлатнинг халқаро ва минтақавий ташкилотлар доирасидаги ўзаро муносабатларига ҳам алоҳида эътибор қаратилган. Ўзаро савдо ҳажмини кўпайтириш ва савдо-иқтисодий алоқаларни ривожлантиришга қаратилган минтақалараро транспорт-логистика лойиҳаларини амалга ошириш масалалари муҳокама қилинган.

Мулоқотда, шунингдек, Афғонистон масаласи бўйича ҳам фикр алмашилган. Эрон Афғонистонни ижтимоий-иқтисодий тиклаш мақсадида тўғридан-тўғри афғонлараро музокараларни ҳар томонлама қўллаб-қувватлаш бўйича Ўзбекистон томонидан олиб борилаётган амалий ишларни юқори баҳолаган.

Учрашув давомида Эрон томони 2021 йил Тошкентда бўлиб ўтадиган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусида юқори даражадаги халқаро конференциясида иштирок этиш истагида эканлигини тасдиқлаган.

Тадбирда умумий кун тартибининг бошқа масалалари ҳам кўриб чиқилган.

Эслатиб ўтамиз, 2017 йилнинг октябрида Абдулазиз Комилов ва Жавод Зариф Ўзбекистон ва Эрон ТИВлари ўртасидаги Ҳамкорлик дастурини имзолаган эди. 2018 йилнинг февралида Теҳронга амалга оширилган ташриф давомида Ўзбекистон ташқи ишлар вазири Эрон ТИВ раҳбари билан БМТ, ШҲТ ва бошқа халқаро ташкилотлар доирасида ҳамкорлик қилиш масалаларини муҳокама қилганди.

Изоҳ
Асосий янгиликлар