Eron tashqi ishlar vaziri Muhammad Javod Zarif boshchiligidagi delegatsiya 4-aprel kuni O‘zbekistonga kelgani haqida xabar berilgan edi. TIV matbuot xizmatining ma’lum qilishicha, 5-aprel kuni O‘zbekiston TIV rahbari Abdulaziz Komilov Eron TIV rahbari Muhammad Javod Zarif bilan uchrashuv o‘tkazdi.
Vazirlik matbuot xizmatining xabar berishicha, tomonlar siyosiy, savdo-iqtisodiy, transport-kommunikatsiya, investitsiya, madaniy-gumanitar va boshqa sohalardagi ikki tomonlama munosabatlarning holati hamda istiqbollarini muhokama qildi.
TIV rahbarlari yaqinda ikki mamlakat tashqi ishlar vazirliklari o‘rtasida bo‘lib o‘tgan siyosiy maslahatlashuvlar VI davrasining samarali natijalarini mamnuniyat bilan qayd etib, barcha darajalarda konstruktiv muloqotni davom ettirish zarurligini ta’kidlagan.
Muzokaralarda ikki davlatning xalqaro va mintaqaviy tashkilotlar doirasidagi o‘zaro munosabatlariga ham alohida e’tibor qaratilgan. O‘zaro savdo hajmini ko‘paytirish va savdo-iqtisodiy aloqalarni rivojlantirishga qaratilgan mintaqalararo transport-logistika loyihalarini amalga oshirish masalalari muhokama qilingan.
Muloqotda, shuningdek, Afg‘oniston masalasi bo‘yicha ham fikr almashilgan. Eron Afg‘onistonni ijtimoiy-iqtisodiy tiklash maqsadida to‘g‘ridan to‘g‘ri afg‘onlararo muzokaralarni har tomonlama qo‘llab-quvvatlash bo‘yicha O‘zbekiston tomonidan olib borilayotgan amaliy ishlarni yuqori baholagan.
Uchrashuv davomida Eron tomoni 2021-yil Toshkentda bo‘lib o‘tadigan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusida yuqori darajadagi xalqaro konferensiyasida ishtirok etish istagida ekanligini tasdiqlagan.
Tadbirda umumiy kun tartibining boshqa masalalari ham ko‘rib chiqilgan.
Eslatib o‘tamiz, 2017-yilning oktabrida Abdulaziz Komilov va Javod Zarif O‘zbekiston va Eron TIVlari o‘rtasidagi Hamkorlik dasturini imzolagan edi. 2018-yilning fevralida Tehronga amalga oshirilgan tashrif davomida O‘zbekiston tashqi ishlar vaziri Eron TIV rahbari bilan BMT, ShHT va boshqa xalqaro tashkilotlar doirasida hamkorlik qilish masalalarini muhokama qilgandi.
Izoh (0)