Жиноят ишлари бўйича Чирчиқ шаҳар судида 5 апрель куни Тошкент вилояти юқумли касалликлар шифохонаси собиқ бош шифокори Гулжаҳон Йўлдошевага ва бошқаларга нисбатан очилган жиноят ишини очиқ суд мажлисида кўриш якунланиб, суд ҳукми эълон қилинди, деб хабар бермоқда «Gazeta.uz».
Хабарда айтилишича, суд Гулжаҳон Йўлдошевани Жиноят кодексининг 167-моддаси (ўзлаштириш ёки растрата йўли билан талон-торож қилиш) 2-қисми «а», «б», «в», «г» бандлари, 207-моддаси (мансабга совуққонлик билан қараш) 3-қисми «а» банди ва 209-моддаси (мансаб сохтакорлиги) 2-қисми «а» бандида назарда тутилган жиноятларни содир этганликда айбдор деб топди.
Унга 3 йил муддатга мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиб, 4 йил муддатга озодликни чеклаш жазоси тайинланди.
Жиноят кодексининг 62-моддасига асосан, Гулжаҳон Йўлдошева 2020 йил 8 сентябрда ушланиб, суд ҳукми чиқарилган кун, яъни 2021 йил 5 апрелга қадар унга нисбатан қамоққа олиш ва уй қамоғи эҳтиёт чоралари қўлланилганини инобатга олиб, тайинланган озодликни чеклаш жазоси муддатидан 6 ой 27 кун чиқарилди. Натижада Гулжаҳон Йўлдошевага тайинланган озодликни чеклаш муддати 3 йил 5 ой 3 кунни ташкил қилди, шу билан бирга, у 3 йил муддатга мансабдорлик ва моддий жавобгарлик юклатиладиган лавозимларда ишлаш ҳуқуқидан маҳрум қилинди.
Яна бир судланувчи Шаҳназар Рўзметов (Тошкент вилояти юқумли касалликлар шифохонаси шифокори) Жиноят кодексининг 116-моддаси (касб юзасидан ўз вазифаларини лозим даражада бажармаслик) 3-қисми ҳамда 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 2-қисми «а», «б» бандлари ва 3-қисмида назарда тутилган жиноятларни содир этганликда айбдор деб топилди ва унга бир йил муддатга мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиб, 3 йил муддатга озодликни чеклаш жазоси тайинланди.
Жаҳонгир Зиёдуллаев (Тошкент вилояти кўп тармоқли тиббиёт маркази шифокори)га қўйилган айбловлардан 228-моддаси 3-қисми (ҳужжатнинг қалбаки эканлигини била туриб, ундан фойдаланиш) олиб ташланди. Шу билан бирга, у Жиноят кодексининг 116-моддаси 3-қисми (касб юзасидан ўз вазифаларини лозим даражада бажармаслик одамлар ўлимига сабаб бўлиши) ва 28,228-моддаси 2-қисми «б» бандида (бир гуруҳ шахслар томонидан олдиндан тил бириктириб ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) назарда тутилган жиноятларни содир этганликда айбдор деб топилди ва 2 йил муддатга мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиб, 3 йил 6 ой муддатга озодликни чеклаш жазоси тайинланди.
Алишер Дадаматов (Тошкент вилояти юқумли касалликлар шифохонаси собиқ бош ҳисобчиси)га қўйилган айбловлардан 25,167-моддаси 3-қисми «а» банди (ўзлаштириш ёки растрата йўли билан жуда кўп миқдорда талон-торож қилиш) олиб ташланди. Шу билан бирга, у Жиноят кодексининг 167-моддаси 2-қисми «б», «в», «г» бандларида (мансаб мавқейини суиистеъмол қилиш йўли билан бир гуруҳ шахслар томонидан олдиндан тил бириктириб такроран ўзлаштириш ёки растрата йўли билан талон-торож қилиш) назарда тутилган жиноятларни содир этганликда айбдор деб топилди. Унга 2 йил муддатга мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиб, ойлик иш ҳақининг 20 фоизини давлат даромади ҳисобига ушлаб қолган ҳолда 2 йил муддатга ахлоқ тузатиш ишлари жазоси тайинланди.
Жанар Акимова (Тошкент вилояти юқумли касалликлар шифохонаси собиқ бош ҳисобчиси вазифасини бажарувчи) Жиноят кодексининг 167-моддаси 2-қисми «б», «в», «г» бандларида (мансаб мавқейини суиистеъмол қилиш йўли билан бир гуруҳ шахслар томонидан олдиндан тил бириктириб такроран ўзлаштириш ёки растрата йўли билан талон-торож қилиш) назарда тутилган жиноятларни содир этганликда айбдор деб топилиб, унга 2 йил муддатга мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиб, ойлик иш ҳақининг 15 фоизини давлат даромади ҳисобига ушлаб қолган ҳолда 2 йил муддатга ахлоқ тузатиш ишлари жазоси тайинланди.
Эслатиб ўтамиз, коронавирусга чалинган бемор ўлими ва 250 миллион сўм бюджет маблағларини талон-торож қилганликда айбланиб, қамоққа олинган Тошкент вилояти бош инфекционисти Гулжаҳон Йўлдошевага нисбатан жиноят иши 2020 йил 11 августда Чирчиқ шаҳар прокуратураси томонидан қўзғатилган. 8 сентябрга келиб, эҳтиёт чораси сифатида айбланувчи қамоққа олинган эди.
Унинг қамоққа олиниши жамоатчилик ўртасида кенг муҳокамаларга сабаб бўлди. Бир қатор давлат ва нодавлат ташкилотларнинг раҳбарлари, хусусан, Сенат раиси Танзила Норбоева, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, гендер тенгликни таъминлаш масалалари бўйича комиссия аъзоси Саида Мирзиёева мазкур ҳодисага муносабат билдириб, прокуратурани шифокорга нисбатан қўлланилган эҳтиёт чорасини ўзгартиришга чақирган. Шундан сўнг Гулжаҳон Йўлдошева 6 октябрь куни уй қамоғига ўтказилганди.
Гулжаҳон Йўлдошева ва бошқаларга нисбатан суд жараёнлари 2020 йил 27 ноябрь куни бошланган эди. Прокурор суддан Тошкент вилояти бош инфекционисти Гулжаҳон Йўлдошевани 5 йилга озодликдан чеклашни сўраганди.
Изоҳ (0)