Профессионал бокснинг супер ярим ўрта (-69,85 кг) вазн тоифасида ҳаракат қилаётган Исроил Мадримов (7-0, 5 КО) 3 апрель куни Тошкентдаги Humo Arena’да ташкил этилган бокс кечасида рингга кўтарилди.
Ўзбекистонлик боксчига конголик енгилмас спортчи Эммани Каломбо (14-1, 14 КО) тўқнаш келди.
Дастлабки раундни ҳар икки боксчи бир-бирини ўрганишга сарфлади ва кичик устунлик Исроил томонида бўлди. Кейинги раундларда Мадримов устунликни ўз фойдасига оғдирди. 5 ва 6-раундда ҳар икки боксчи рақибига сезиларли зарбаларни ўтказа олди.
7-раунд Мадримовнинг фаоллигидан ўтган бўлса-да, конголик боксчи ҳам кучли зарбалар билан жавоб қайтара олди. 8-раунд охирлаб бораётганда Мадримовнинг кучли зарбасидан кейин Каломбо нокдаун ҳолатига тушди. 9 ва 10-раундлар ҳам тўлиқ ўзбекистонлик боксчининг устунлигида ўтди.
Шу тариқа 10 раунд давом этган жангда ҳакамлар бир овоздан Мадримов ғалабасини қайд этди.
Мазкур бокс оқшомида Иқболжон Холдоров профессионал рингдаги дебют жангида танзаниялик рақибини нокаутга учратди, Санжар Турсунов украиналик боксчини мағлуб этди, Ҳасанбой Дўстматов нокаут билан ғалаба қозониб, WBA International камарига эга чиқди. Баҳодир Жалолов латвиялик боксчини муддатидан аввал таслим этди, Миразизбек Мирзахалилов эса дебют жангини 1-раунддаги нокаутли ғалаба билан якунлади.
Эслатиб ўтамиз, Мадримов 2020 йилнинг 16 август санасида америкалик Эрик Уокерга (20-3, 9 КО) қарши жангдаги ғалабаси орқали WBA Жаҳон чемпионлик камари учун мажбурий даъвогарга айланганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)