Франция президенти Эмануэл Макрон мамлакатнинг барча ҳудудларида тўрт ҳафталик карантин жорий қилди. Бу ҳақда Макроннинг аҳолига қилган мурожаатномасига таяниб, France24 телеканали хабар берди, деб ёзмоқда «РБК».
Коронавирус билан касалланиш ҳолатларининг кескин кўпайгани карантиннинг қайта жорий этилишига асосий сабаб бўлди. Жаҳон соғлиқни сақлаш ташкилот (ЖССТ) маълумотларига кўра, Францияда 20 январда 23 347 кишида, 20 февралда 23 170 кишида коронавирус аниқланган, март ойининг ўрталаридан бошлаб бу кўрсаткич ўса бошлаган: 12 мартда 27 166 кишида, 17 март куни 29 145 кишида, 26 март куни 45 401 кишида коронавирус қайд этилган. 1 апрель куни эса бу кўрсаткич 58 828 нафарга етди.
«Вирус нафақат юқумли, балки ўта хавфли ҳам», — деди давлат раҳбари ва «ҳозир жонлантириш бўлимидаги беморларнинг 44 фоизи 65 ёшдан кичик» эканини таъкидлади.
Францияда карантин сабабли жорий қилинган чора-тадбирлар:
- мамлакатнинг барча ҳудудида соат 19:00 дан комендантлик соати йўлга қўйилди;
- ходимларнинг имкон борича масофавий иш тартибига ўтиши белгиланди;
- болалар боғчаси, мактаб ва коллежларнинг фаолияти уч ҳафтага тўхтатилди, талабалар ҳафтада бир марта университетга бориши мумкин;
- бирламчи эҳтиёж маҳсулотларини сотмайдиган дўконлар ёпилди, китоб ва мусиқа дўконлари, шунингдек, хўжалик маҳсулотлари дўконлари бундан мустасно. Сартарошхоналар ҳам фаолиятини давом эттиради;
- изоляция ҳудудидан жиддий сабабларсиз 10 километрдан ортиқ масофага чиқиш тақиқланади; францияликлар бир ҳудуддан бошқа ҳудудга фақат Пасха байрамида бориши мумкин.
Аввалроқ Франциянинг 19 та ҳудудида карантин чоралари жорий қилинган эди. Улар орасида пойтахт ҳудудида жойлашган Ил-де-Франц, Лион ва мамлакатнинг бошқа минтақаларидаги шаҳарлар ҳам бор эди. Давлат таркибига жами 101 та ҳудуд киради, улардан бештаси Франциянинг асосий ҳудудидан узоқда, денгиз бўйида жойлашган. Мамлакат бўйлаб 19:00 дан 06:00 гача комендантлик соати жорий қилинган, шунингдек, барлар, ресторанлар, музейлар, кинотеатрлар ва одамлар йиғиладиган бошқа жойлар фаолияти тўхтатилган.
Жонс Ҳопкинс университетининг маълумотларига кўра, бугунги кунда Франция коронавирус билан касалланганлар сони бўйича дунёда тўртинчи ўринда турибди. Пандемия бошидан буён 4,7 миллион аҳолида коронавирус аниқланди, 95 мингдан ортиқ бемор вафот этди. 1 апрель куни мамлакатда 58 828 кишида коронавирус аниқланди, 299 киши вафот этди.
Аввалроқ Франция президенти Россия ва Хитойнинг COVID-19’га қарши вакциналар етказиб бериш соҳасидаги ҳаракатлари туфайли Европа янги турдаги жаҳон урушига дуч келганини айтган эди. Унинг фикрига кўра, Европа мамлакатлари вакциналар масаласида бошқаларга қарам бўлмаслик учун зарур чораларни кўриши керак.
Шунингдек, Франция президенти Эммануэль Макрон аҳолини коронавирусга қарши эмлаш имкониятларини максимал даражада оширишга чақирди. Эмлаш марказига ташрифи давомида Макрон вакцинация «максимал» бўлиши ва ҳафтанинг етти кунида «эрталаб, тушдан кейин ва кечқурун» ўтказилиши кераклигини айтди.
Париж шаҳрининг чеккасида жойлашган мамлакатдаги энг йирик Stade de France спорт аренасида эса коронавирусга қарши эмлаш жараёни олиб бориладиган катта кўламли вакцинация маркази ташкил этилиши маълум қилинди.
У ерда вакцинация карантин туфайли ёпилган стадионга жамоатчилик кириши учун рухсат берилганидан кейин — апрель ойининг бошида старт олиши кутилмоқда. Маҳаллий ҳукумат вакилининг таъкидлашича, бу ҳафтасига 10 минг кишини вакцина билан таъминловчи ҳақиқий «вакцинадром» бўлади.
Изоҳ (0)