Parij shahrining chekkasida joylashgan mamlakatdagi eng yirik Stade de France sport arenasida koronavirusga qarshi emlash jarayoni olib boriladigan katta ko‘lamli vaksinatsiya markazi tashkil etiladi. Bu haqda “Korrespondent.net” xabar berdi.
U yerda vaksinatsiya karantin tufayli yopilgan stadionga jamoatchilik kirishi uchun ruxsat berilganidan keyin — aprel oyining boshida start olishi kutilmoqda. Mahalliy hukumat vakilining ta’kidlashicha, bu haftasiga 10 ming kishini vaksina bilan ta’minlovchi haqiqiy “vaksinadrom” bo‘ladi.
Stade de France vaksinatsiya markazida 120 kishi faoliyat yuritadi.
22-mart holatiga ko‘ra, Fransiyada koronavirusga qarshi vaksinaning birinchi dozasini 6,1 milliondan ortiq, ikkinchi dozasini 2,5 millionga yaqin kishi oldi. Mamlakatda vaksinatsiya kampaniyasini davom ettirish uchun yana 1,1 million doza vaksina mavjud. Hukumat iyun oyining o‘rtasigacha 30 million aholini emlashni rejalashtirmoqda.
Avvalroq Fransiyada COVID-19’ning yangi shtammi ro‘yxatga olingani haqida xabar berildi. Lekin uning yuqumlilik va xavflilik darajasi yuqoriroq ekanligi haqida hali ma’lumot yo‘q. Vazirlikning ma’lumot berishicha, koronavirusning yangi varianti Bretan viloyatining Lanyon shahridagi kasalxonaning bir guruh bemorlarida aniqlandi.
Shuningdek, Fransiya bosh vaziri Jak Kasteks COVID-19 koronavirusiga qarshi AstraZeneca vaksinasi bilan emlandi. 55 yoshli Kasteks vaksinaning birinchi dozasini Parij yaqinidagi Val-de-Marn departamentida joylashgan Bejen harbiy gospitalida 19-mart kuni qabul qilgan.
Izoh (0)