Ўзбекистон Президенти раислигида 1 апрель куни аҳоли саломатлигини сақлаш ва коронавирусга қарши курашиш борасида амалга оширилаётган ишлар ҳамда келгусидаги устувор вазифалар муҳокамаси юзасидан видеоселектор йиғилиши ўтказилди. «Gazeta.uz»нинг ёзишича, Шавкат Мирзиёев ушбу йўналишда қўйилган вазифаларни назорат қилиши учун қатор раҳбарларни вилоятларга бириктирган.
Раҳбарлар 1 майга қадар Сирдарё вилояти ҳамда 26 та туман ва шаҳар тажрибасини республиканинг барча ҳудудларида бошлаш керак. Бунда, қишлоқ ва маҳаллаларда тиббиёт бригадаларини ташкил этиб, тиббий хариталарни шакллантириш, аҳолини 4 та хавф гуруҳларига ажратиб, манзилли кўрикдан ўтказиш ва даволаш ишларини ташкил қилиши зарур.
Президентнинг маълум қилишича, Жисмоний тарбия ва спорт вазирлигини бошқариш вазифаси юкланган бош вазир ўринбосари Азиз Абдуҳакимов комплекси биринчи ва иккинчи хавф гуруҳига кирадиган аҳолининг (соғлом ва носоғлом турмуш тарзини олиб бораётган) фаолиятига жавоб беради.
Жисмоний тарбия ва спорт вазирининг ўринбосари Аваз Каримов спорт инструкторларини тақсимлаб, аҳоли ўртасида оммавий гимнастикани ташкил этиши керак.
Соғлиқни сақлаш вазири Абдуҳаким Хожибоев учинчи ва тўртинчи гуруҳ билан ишлайди (беморлар ва парваришга муҳтож шахслар ёки ногиронлиги бўлган фуқаролар).
«Тиббиёт соҳасини ислоҳ қилиш осон эмас. Бу пахта экиш ва уни теришга ўхшамайди», — дейди Президент.
«Бу масалада Наманган тажрибасини кенг қўллаш зарур, барча беморларни пойтахтга юбориш эмас, балки уларнинг яшаш жойларида ихтисослашган тиббий ёрдам олишига шароит яратиш керак… Олдинлари Тошкентдаги марказга 5 минг киши навбатда туради дейишганди, уларнинг барчаси вилоятдан келганлар. Бу бизда тизим йўқлигидан далолат», — дейди давлат раҳбари.
Мисол сифатида келтирилган Наманган вилоятида тиббиёт ходимлари 763 та маҳаллада 37 минг кишини тиббий кўрикдан ўтказган. Уларнинг 22 минг нафари учун амбулатор даволаш ташкиллаштирилган, 4,5 минг нафарига вилоятлар, туман ва шаҳар тиббиёт муассасаларида стационар даволаниш белгиланган.
Президентнинг сўзларига кўра, яқин кунларда вилоят соғлиқни сақлаш бошқармаси бошлиқлари Тошкентга даволаниш учун келган беморларни қайтаришни назарда тутувчи тизимни жорий этиш режалаштирилмоқда.
«Чунки ҳар бир вилоятда шароит яратяпмиз. Тошкентдаги мутахассислар жойлардаги тиббиёт ходимларига ўргатмоқда. Беморларга қийинчилик туғдиришни тўхтатиш вақти келди», — дейди у.
Беморларнинг ўз вилоятларида даволаниши учун соғлиқни сақлаш вазири уларнинг Тошкентга даволанишга, шу жумладан, шошилинч ва мураккаб операцияларга юборилиши мумкин бўлган ҳолатларни белгилаши керак.
2020 йилда ихтисослашган марказларда даволанишга муҳтож бўлган 84 минг беморнинг 51 минги (61 фоизи) бепул ордер олган.
Молия вазирлигига ордерлар учун ажратмаларни 2021 йилда 1,5 баравар ошириш ва қўшимча 80 миллиард сўм ажратиш (250 миллиард сўмгача етказиш) бўйича топшириқ берилган.
Соғлиқни сақлаш вазирлигига 2021 йил охирига қадар ҳокимликлар билан ҳамкорликда ҳар бир беморни аниқ жойи ва даволаниш муддатини кўрсатган ҳолда даволашни ташкиллаштириш вазифаси қўйилди. Ихтисослашган тиббиёт марказлари қисқа муддатли курсларда 3 мингдан ортиқ оилавий шифокорларни ўқитади.
Мавзуга доир:
Изоҳ (0)