Samsung компанияси Galaxy S линейкасидаги еттинчи авлод смартфони мобил телефон эмаслигини исботлашга уринди. Бу амалга ошмаган бўлса-да, бироқ келтирилган далиллар қизиқарли, деб ёзади Hi-Tech.Mail.ru.
Мазкур ҳолат Жанубий Африкада содир бўлган. Samsung ЖАРнинг солиқ органи — SARS’ни импорт тарифларини пасайтириш ва тўланган солиқларнинг бир қисмини қайтаришга ишонтиришга уриниб кўрган. Агарда SARS Galaxy S7’ни мобил телефон эмас, бошқа девайс сифатида қабул қилганида, бу ростдан ҳам амалга ошган бўлар эди.
Samsung’нинг таъкидлашича, Galaxy S7 оддий мобил алоқа қўнғироқлари учун эмас, балки хабарлар, мусиқа, тасвирлар ёки бошқа маълумотларни интернет орқали узатиш ёки қабул қилиш имконини беради. Яъни Galaxy S7 — бу ҳамёнга сиғадиган компьютер, шу сабабли у оддий телефонлар каби солиққа тортилмаслиги керак.
SARS Samsung’нинг далилларига қўшилмаган. Суд солиқ органи тарафини олган ва Galaxy S7’нинг кўплаб қўшимча функциялари бўлишига қарамай, унинг асосий вазифаси — уяли алоқа тармоғи орқали мулоқот қилишга мўлжалланган телефон эканлигини маълум қилган.
Шунингдек, суднинг қўшимча қилишича, Samsung’нинг Galaxy S7’га ноутбук ёки компьютер номини беришга уриниши иккиюзламачилик ҳисобланади ва интернетга уланиш учун мосламадан фойдаланиш гаджетнинг объектив хусусиятларини ўзгартирмайди.
Мавзуга доир: Дунёдаги энг оммабоп смартфонлар номи эълон қилинди
Изоҳ (0)