Vivo компанияси ультраингичка, 64 Мп камера ва кенг сиғимли аккумуляторга эга моделини сотувга чиқарди

Vivo компанияси Хитойда у қадар қиммат бўлмаган ультраингичка Vivo S9e смартфонини сотувга чиқарди, деб хабар беради IXBT.

Мазкур модель 2021 йилнинг март ойи бошларида, Vivo’нинг 5G алоқа тармоғини қўллаб-қувватлайдиган энг ингичка смартфонига айланган Vivo S9 билан бирга тақдим этилганди (унинг қалинлиги 7,37 миллиметр). Vivo S9e бирор рекордни янгилагани йўқ, бироқ техник жиҳатдан у жуда жозибадор — қалинлиги 7,4 миллиметр бўлиб, у ҳам 5G алоқа тармоғини қўллаб-қувватлайди.

Смартфон шиша панел ва металл ромдан ишланган. Қурилма корпуси уч хил рангда — кўк, кул ранг ва оқда таклиф этилади. Иккита версияси мавжуд — 367 доллар эвазига 8/128 гигабайтли ва 413 долларга 8/256 гигабайтли.

Vivo S9e Full HD+ сифатни қўллаб-қувватлайдиган 6,44 дюймли AMOLED экран билан жиҳозланган бўлиб, ундаги тасвирнинг янгиланиш частотаси 90 герцга тенг. 32 мегапикселли фронтал камераси томчисимон қирқимга жойлаштирилган, учталик асосий камерага эга (64, 8 ва 2 Мп). Қурилма SoC MediaTek Dimensity 820 процессорида ишлайди, аккумулятор сиғими 4100 мА/соат бўлиб, 33 ваттли тезкор қувватланиш функциясига эга. Смартфоннинг фронтал камераси тунда портрет усулида суратга олиш имконини берадиган махсус режим — Sper Portrait Night View 2.0 га эга.

Аввалроқ Vivo компанияси ечиладиган қўшимча камерали телефон концептини тақдим этгани тўғрисида хабар берилганди.