Хитойнинг Xiaomi компанияси Snapdragon 888 процессорига эга ёшлар учун мўлжалланган ҳамёнбоп Mi 11 Lite ва Mi 11i флагманларини тақдим этди, деб хабар беради Hi-Tech.Mail.ru.
Xiaomi Mi 11 Lite модели Mi 11 флагманининг соддалаштирилган версиясига айланган — унга 90 герцли янгиланиш частотасига эга 6,55 дюймли AMOLED-дисплей ўрнатилган. Иқтисодий тежамкорлик мақсадида бармоқ изи сканери қурилманинг ён томонига жойлаштирилган.
Камералар жамланмаси ҳам соддалашган — 108 мегапикселли асосий модуль ўрнига арзонроқ бўлган 64 мегапикселли сенсор ўрнатилган. Унга 8 мегапикселли кенг бурчакли объектив ва 5 мегапикселли макромодуль қўшилган.
Процессор сифатида 5G алоқа тармоғини қўллаб-қувватлайдиган Snapdragon 780G’дан фойдаланилган, шунингдек, бошқа чипга эга 4G-версияси ҳам тақдим этилади. Қурилмага сиғими 4250 мА/соатга тенг аккумулятор ўрнатилган бўлиб, у 33 ваттли тезкор қувватланиш функциясига эга.
Xiaomi Mi 11 Lite’нинг 8/128 гигабайтли версияси Хитойда 2299 юандан (350 доллар) сотувга чиққан.
Кам маблағ сарфлаб, максимал даражада самарадорлик истайдиганлар учун Xiaomi Mi 11i тақдим этилди — у Mi 11 флагманига яқинроқ. Смартфонга Full HD+ сифатни қўллаб-қувватлайдиган ва 120 герцли янгиланиш частотасига эга 6,67 дюймли AMOLED-дисплей ўрнатилган, бармоқ изи сканери ён томондаги ёқиш тугмасига бирлаштирилган.
Қурилма тезкор UFS 3/1 ва LPDDR5 тезкор хотирасига эга Snapdragon 888 процессорида ишлайди, аккумулятор сиғими 4520 мА/соат, 33 ваттли тезкор қувватланиш функциясига эга. Шунингдек, унинг асосий камераси 108 мегапикселни ташкил этади, кенг бурчакли ва алоҳида макромодулга ҳам эга.
Смартфон нархи 659 еврони ташкил этади.
Аввалроқ Xiaomi ўзининг энг қиммат флагмани Mi 11 Ultra’ни тақдим этгани, геймерлар учун Black Shark 4 ва 4 Pro флагманларини сотувга чиқаргани тўғрисида хабар берилганди.
Изоҳ (0)