АҚШда 27 та ташкилот Жо Байденни Россия президенти Владимир Путин билан конструктив икки томонлама музокаралар олиб боришга чақирди. Бу ҳақда The Hill нашрига асосланиб «РБК» хабар берди.
Фото: «РИА Новости»
«Дипломатия, қурол назорати, қуролсизланиш ва тинчликни тарғиб қилувчи миллий ташкилотлар сифатида биз дунёдаги ядро каллакларининг 90 фоиздан ортиғига эгалик қилаётган ушбу икки мамлакат раҳбарлари ўртасидаги салбий алмашинувлардан чуқур хавотирдамиз», — дейилади ташкилотлар баёнотида.
Нашр баёнотни имзолаганларнинг тўлиқ рўйхатини тақдим этмади, аммо уларнинг таркибида Justice Democrats, Blue America, Demand Progress, Our Revolution ва Progressive Democrats of America каби «сўл»ларга хайрихоҳ ташкилотлар борлигини таъкидлади.
Ташкилотлар Америка президенти «мулоҳазасиз баёнотлар беришни» бас қилиши, бунинг ўрнига Россия ҳукумати билан ядро қуроли бўйича музокараларни давом эттириши керак деб ҳисоблайди.
Мурожаат муаллифлари Байден дипломатияни мамлакатнинг «ташқи сиёсат марказига» айлантиришга ваъда берганини эслатиб ўтди. Шунингдек, улар АҚШ ва Россия ўртасида ядровий қуролланиш пойгаси хавфи ҳозир «ҳар қачонгидан ҳам равшанроқ» эканини таъкидлаган.
«Демократик партиянинг прогрессив базаси аъзолари Путинга ёки Россияга қарши уруш олиб бораётган ташқи сиёсатдан манфаатдор эмас», — деди Progressive Democrats of America партиясининг ижрочи директори Алан Мински.
«Одамларнинг истаги халқаро ҳамкорлик билан барчамизга ўтган йилги иқтисодий ва соғлиқни сақлаш соҳасидаги офатлардан тезроқ қутилишга имкон берадиган хавфсиз дунёда яшашдир. Биз Совуқ урушнинг қақшатқич зарбаларига дош беролмаймиз, ядро уруши ёқасида мувозанат сақлаш ҳақида гапирмаса ҳам бўлади», — дея қўшимча қилди у.
Эслатиб ўтамиз, АҚШ президенти Жо Байден ABC телеканалига берган интервьюсида журналистнинг «Россия президенти Владимир Путинни қотил деб ҳисоблайсизми?» — деган саволига тасдиқ жавобини берган.
Кремль эса Жо Байденнинг Владимир Путин ҳақидаги баёнотларини «жуда ёмон» деб ҳисоблашини айтган. Бу ҳақда Россия президентининг матбуот котиби Дмитрий Песков журналистларга берган интервьюсида айтиб ўтган.
Ўз навбатида, Путин АҚШ давлат раҳбари Жо Байденга тўғридан-тўғри эфир орқали мулоқот қилишни таклиф этган. АҚШ президенти Жо Байден Россия президенти Владимир Путин уни таклиф қилган очиқ муҳокамага розилик бериш-бермаслиги ҳақидаги саволни эътиборсиз қолдирган.
