АҚШ сурияликларга гуманитар ёрдам тариқасида 596 миллион доллар ажратади, деб маълумот берди АҚШнинг БМТдаги доимий вакили Линда Томас-Гринфилд Сурияни қўллаб-қувватлашга бағишланган «Брюссель-5» видеоконференциясида. Унинг баёноти Давлат департаменти сайтида намойиш этилди. Шунингдек, АҚШ Сурия президенти Башар Асад режими ва Россия хатти-ҳаракатларини қоралади. Бу ҳақда «Коммерсантъ» хабар берди.
Хабарда таъкидланишича, АҚШнинг ёрдами Суриянинг 13,4 миллион аҳолисига ва Туркия, Ливан, Иордания, Ироқ ва Мисрдаги 5,6 миллион қочқинга фойда келтиради. АҚШнинг сўнгги ўн йилда кўрсатган жами гуманитар ёрдамларининг умумий қиймати 13 миллиард долларга етди.
«Сурия халқи Асад режими ва Россиянинг ҳаводан зарбалари, гаровга олиш, ИШИД қабоҳатлари ва кимёвий қурол билан ҳужумлари каби сон-саноқсиз ваҳшийликларга дучор бўлди», — дейилади Давлат департаменти хабарида. Шунингдек, Вашингтон тизимли коррупция ва Башар Асаднинг самарасиз иқтисодий ҳаракатлари инқирозни янада кучайтирди, деб ҳисоблайди.
2021 йилнинг февраль ойида Жо Байден Сурия—Эрон чегараси ҳудудидаги эронпараст кучларга тегишли бўлган объектларга ҳужум қилишни маъқуллади. Операция Ироқнинг Америка объектларига қилган ҳужумига жавоб бўлди.
Натижада Демократлар ва Республикачилар партияларидан сенаторлар Тим Кейн ва Тодд Янг президентнинг ҳарбий куч ишлатишдаги ваколатларини чеклаш тўғрисидаги қонун лойиҳасини тақдим этди. Илгари сенаторлар президент Дональд Трамп даврида ҳам худди шундай қонун лойиҳасини илгари сурган, аммо давлат раҳбарининг ветосидан ўтолмаган.
Изоҳ (0)