Uzbekistan Airways май ойидан бошлаб Ригага авиақатновларни қайта тиклайди

Uzbekistan Airways май ойидан бошлаб Тошкент—Рига—Тошкент йўналиши бўйича ҳар ҳафта амалга ошириладиган авиақатновлар қайта тикланишини эълон қилди.

Қайд этилишича, Ригага ташриф буюришга фақат жиддий сабабларга кўра, хусусан, иш, ўқиш, оилани бирлаштириш, вояга етмаган болаларни кузатиб бориш, дафн маросимларида қатнашиш, тиббий мақсадларда ва Латвияда яшаш учун рухсатнома мавжуд бўлганда рухсат этилади. Ушбу сабаблардан бири cоvidpass.lv. сайтида кўрсатилиши лозим.

Тошкент–Рига йўналиши бўйича авиачипта нархи хабар тайёрланган вақтда 4,6 миллион сўмдан, Тошкент–Рига–Тошкент йўналиши бўйича авиачипта нархи эса 8,4 миллион сўмдан бошланиши кўрсатилган.

Аввалроқ Тошкент–Тбилиси–Тошкент йўналишидаги авиақатновлар 30 мартдан қайта тикланиши, Россия 1 апрелдан Ўзбекистон билан мунтазам авиақатновларни тиклаши ҳақида хабар берилган эди.