Шавкат Мирзиёев расмий ташриф билан Ўзбекистонга келган Венгрия бош вазири Виктор Орбан билан 30 март куни тор доирада мулоқот ўтказгани ҳақида хабар берилган эди. Президент матбуот хизматининг маълум қилишича, Шавкат Мирзиёев ва Виктор Орбан музокараларни икки мамлакат расмий делегациялари иштирокида давом эттирди.
Хабарда таъкидланишича, бугунги кунда Венгрия Ўзбекистоннинг Европадаги муҳим шерикларидан бири ҳисобланади. Сўнгги 4 йилда икки мамлакат ўртасидаги ўзаро савдо айланмаси ҳажми салкам 3 баробарга ўсган. Мураккаб пандемия шароитига қарамай, 2020 йилда ҳам бу ижобий динамика сақлаб қолинган.
Ишбилармонлар ва ҳудудлар ўртасида яқин алоқалар йўлга қўйилгани бунда муҳим омил бўлмоқда. Хусусан, шу йил февраль ойида Будапештда иқтисодий ҳамкорлик бўйича ҳукуматлараро комиссиянинг навбатдаги йиғилиши ва бизнес-форум ўтказилган эди. 29 март куни Тошкентда икки мамлакат Ишбилармонлар кенгашининг биринчи мажлиси бўлиб ўтди.
Музокарада, шунингдек, икки томонлама ҳамкорлик борасида ҳали ишга солинмаган жуда катта имкониятлар борлиги таъкидланган. Шу сабабли асосий эътибор савдо-иқтисодий, инвестициявий ва молиявий алоқаларни янада ривожлантириш масалаларига қаратилган.
Шавкат Мирзиёев мамлакатлар ўртасидаги товар айирбошлашни кўпайтириш, савдо ҳажми мувозанатини тенглаштириш, зарур маҳсулотларни ўзаро етказиб беришни кўпайтириш муҳимлигини таъкидлади. Бу борада Будапештда ташкил этилаётган Ўзбекистон-Венгрия савдо уйи имкониятларидан самарали фойдаланиш зарурлиги қайд этилди.
Хабарда айтилишича, Венгриянинг илғор тажрибаси асосида Ўзбекистонда озиқ-овқат саноати, фармацевтика, қишлоқ хўжалиги маҳсулотларини қайта ишлаш, кимё ва машинасозлик соҳаларида янги лойиҳаларни амалга оширишга келишиб олинди.
Самарқанд ва Жиззах вилоятларида иқтисодий ва ижтимоий соҳаларни модернизация қилиш, жумладан, қишлоқ хўжалигини саноатлаштириш, экспорт салоҳиятини ошириш борасида Венгрия тажрибасини татбиқ этиш мўлжалланмоқда. Шу мақсадда Венгриядан юқори малакали экспертлар гуруҳи Ўзбекистонга келди.
Давлат раҳбари икки мамлакат ҳудудлари ўртасида шериклик алоқаларини ўрнатиш, ҳар йили Минтақалар форумини ўтказиш таклифини билдирди.
Венгрия қишлоқ хўжалиги, меваларни сақлаш ва қайта ишлаш, балиқчилик ҳамда уруғчилик соҳаларидаги илғор тажриба ва технологиялар билан алмашишга тайёрлигини билдирди.
Учрашувда маданий-гуманитар соҳалардаги ҳамкорликни ривожлантириш масалаларига ҳам катта эътибор қаратилди.
Эслатиб ўтамиз, Венгрия бош вазири Виктор Орбан 29 март куни расмий ташриф билан Ўзбекистонга келди. Бош вазир ва унинг рафиқасини Ислом Каримов номидаги Тошкент халқаро аэропортида Ўзбекистон бош вазири Абдулла Арипов кутиб олди. Виктор Орбан Ўзбекистонга илк расмий ташрифини Мустақиллик майдонидан бошлаб Мустақиллик ва эзгулик монументи пойига гул қўйди. Шундан сўнг Венгрия делегацияси ўзи учун ажратилган қароргоҳга йўл олди.
Кўксарой қароргоҳида 30 март куни Венгрия бош вазири Виктор Орбанни расмий кутиб олиш маросими бўлиб ўтди. Унда Ўзбекистон ва Венгрия етакчиларининг тор доирадаги мулоқоти бўлиб ўтди.
Изоҳ (0)