Shavkat Mirziyoyev rasmiy tashrif bilan O‘zbekistonga kelgan Vengriya bosh vaziri Viktor Orban bilan 30-mart kuni tor doirada muloqot o‘tkazgani haqida xabar berilgan edi. Prezident matbuot xizmatining ma’lum qilishicha, Shavkat Mirziyoyev va Viktor Orban muzokaralarni ikki mamlakat rasmiy delegatsiyalari ishtirokida davom ettirdi.
Xabarda ta’kidlanishicha, bugungi kunda Vengriya O‘zbekistonning Yevropadagi muhim sheriklaridan biri hisoblanadi. So‘nggi 4 yilda ikki mamlakat o‘rtasidagi o‘zaro savdo aylanmasi hajmi salkam 3 barobarga o‘sgan. Murakkab pandemiya sharoitiga qaramay, 2020-yilda ham bu ijobiy dinamika saqlab qolingan.
Ishbilarmonlar va hududlar o‘rtasida yaqin aloqalar yo‘lga qo‘yilgani bunda muhim omil bo‘lmoqda. Xususan, shu yil fevral oyida Budapeshtda iqtisodiy hamkorlik bo‘yicha hukumatlararo komissiyaning navbatdagi yig‘ilishi va biznes-forum o‘tkazilgan edi. 29-mart kuni Toshkentda ikki mamlakat Ishbilarmonlar kengashining birinchi majlisi bo‘lib o‘tdi.
Muzokarada, shuningdek, ikki tomonlama hamkorlik borasida hali ishga solinmagan juda katta imkoniyatlar borligi ta’kidlangan. Shu sababli asosiy e’tibor savdo-iqtisodiy, investitsiyaviy va moliyaviy aloqalarni yanada rivojlantirish masalalariga qaratilgan.
Shavkat Mirziyoyev mamlakatlar o‘rtasidagi tovar ayirboshlashni ko‘paytirish, savdo hajmi muvozanatini tenglashtirish, zarur mahsulotlarni o‘zaro yetkazib berishni ko‘paytirish muhimligini ta’kidladi. Bu borada Budapeshtda tashkil etilayotgan O‘zbekiston-Vengriya savdo uyi imkoniyatlaridan samarali foydalanish zarurligi qayd etildi.
Xabarda aytilishicha, Vengriyaning ilg‘or tajribasi asosida O‘zbekistonda oziq-ovqat sanoati, farmatsevtika, qishloq xo‘jaligi mahsulotlarini qayta ishlash, kimyo va mashinasozlik sohalarida yangi loyihalarni amalga oshirishga kelishib olindi.
Samarqand va Jizzax viloyatlarida iqtisodiy va ijtimoiy sohalarni modernizatsiya qilish, jumladan, qishloq xo‘jaligini sanoatlashtirish, eksport salohiyatini oshirish borasida Vengriya tajribasini tatbiq etish mo‘ljallanmoqda. Shu maqsadda Vengriyadan yuqori malakali ekspertlar guruhi O‘zbekistonga keldi.
Davlat rahbari ikki mamlakat hududlari o‘rtasida sheriklik aloqalarini o‘rnatish, har yili Mintaqalar forumini o‘tkazish taklifini bildirdi.
Vengriya qishloq xo‘jaligi, mevalarni saqlash va qayta ishlash, baliqchilik hamda urug‘chilik sohalaridagi ilg‘or tajriba va texnologiyalar bilan almashishga tayyorligini bildirdi.
Uchrashuvda madaniy-gumanitar sohalardagi hamkorlikni rivojlantirish masalalariga ham katta e’tibor qaratildi.
Eslatib o‘tamiz, Vengriya bosh vaziri Viktor Orban 29-mart kuni rasmiy tashrif bilan O‘zbekistonga keldi. Bosh vazir va uning rafiqasini Islom Karimov nomidagi Toshkent xalqaro aeroportida O‘zbekiston bosh vaziri Abdulla Aripov kutib oldi. Viktor Orban O‘zbekistonga ilk rasmiy tashrifini Mustaqillik maydonidan boshlab Mustaqillik va ezgulik monumenti poyiga gul qo‘ydi. Shundan so‘ng Vengriya delegatsiyasi o‘zi uchun ajratilgan qarorgohga yo‘l oldi.
Ko‘ksaroy qarorgohida 30-mart kuni Vengriya bosh vaziri Viktor Orbanni rasmiy kutib olish marosimi bo‘lib o‘tdi. Unda O‘zbekiston va Vengriya yetakchilarining tor doiradagi muloqoti bo‘lib o‘tdi.
Izoh (0)