Бугун,

  • USD 11014.01
  • RUB 191.8
  • EUR 10674.78

Канада Россиянинг Қримни ўзига қўшиб олиши муносабати билан унга қарши янги санкциялар жорий қилди, деб ёзмоқда «РБК».

Фото: э-неwс.су

Фото: э-неwс.су

Россиялик икки нафар жисмоний ва тўртта юридик шахс чекловлар остига тушди, хусусан:

  •  Grand Service Express компанияси (Қрим билан темир йўл алоқа оператори)нинг бош директори Александр Ганов;
  • «Мостотрест» инфратузилма қурилиш компанияси директори Леонид Риженкин;
  • «Ленпромтранспроэкт» очиқ акциядорлик жамияти (ОАЖ);
  • «Қрим темир йўли» Федерал давлат унитар корхонаси;
  • «Қрим биринчи суғурта компанияси»;
  • «Беркакит-Томмот-Якуцк темир йўл қурилиш бошқармаси» ОАЖ.
Аввалроқ 24 март куни Канада ҳукумати тўққиз нафар россияликка қарши инсон ҳуқуқларини бузганлик учун санкциялар жорий қилган эди. Рўйхатдан, хусусан, Россия бош прокурори Игор Краснов, «Росгвардия» директори Виктор Золотов ва президент маъмурияти раҳбарининг ўринбосари Сергей Кириенко ҳам ўрин олган. Уларнинг Канададаги активлари музлатилган, мамлакатга кириши тақиқланган.

Оттавада таъкидланишича, санкциялар «Россияда инсон ҳуқуқларини қўпол ва мунтазам равишда бузилишида иштирок этган» шахсларга нисбатан қўлланилмоқда. Канада ҳукумати мансабдор шахсларни айнан нима учун санкциялар рўйхатига киритганини маълум қилмади, аммо бу АҚШ молия вазирлиги томонидан Алексей Навальний атрофидаги вазият туфайли эълон қилинган санкциялар рўйхатга мос келади.

Россия президент матбуот котиби Дмитрий Песковнинг таъкидлашича, Москва Канаданинг Россияга қарши санкцияларини ноқонуний деб ҳисоблайди ва унга қарши чоралар кўради. Россиянинг Канададаги элчихонаси янги чекловлар «ҳақиқатни инкор этади» ва «нафақат халқаро қонунчиликка, балки инсонпарварлик тамойилларига ҳам зид келади» деб ҳисоблайди.

Канададан кейин Австралия ҳукумати Россияга қарши санкциялар киритди. Австралия Қрим кўпригининг темир йўл қисмини қуриш ва эксплуатация қилишга алоқадор россиялик бир нафар фуқаро ва тўртта компанияга қарши чекловлар жорий қилди.

Австралия ташқи ишлар Марис Пейннинг таъкидлашича, мазкур чора-тадбирлар аввалроқ санкциялар эълон қилган Канада билан келишилган ҳолда, шунингдек Евроиттифоқ ва Буюк Британия томонидан эълон қилинган чекловларга мувофиқ қўлланилган. Вазир Россиянинг қайси компаниялари ва фуқароларига нисбатан санкция киритилганига аниқлик киритмади.

«Керч орқали ўтувчи кўприк — Россия ўзига ноқонуний қўшиб олган Қрим яримороли устидан назоратини мустаҳкамлашга уринишнинг белгисидир. Санкцияга учраган  шахслар ўз хатти-ҳаракатлари билан Қрим ва Севастополнинг ноқонуний аннексиясини қонунийлаштиришга уриниш ва Украина шарқидаги айирмачилар фаолиятини қўллаб-қувватлашда иштирок этмоқда», — деди вазир.

Аввалроқ Украина президенти Владимир Зеленский Россиянинг жисмоний ва юридик шахсларига янги санкциялар киритган эди.

Изоҳ
Асосий янгиликлар