Бугун,

  • USD 10940.05
  • RUB 182.26
  • EUR 11121.65

Президент Шавкат Мирзиёевнинг янги матбуот котиби Шерзод Асадов 29 март, душанба куни Миллий матбуот марказида илк брифингни ўтказди. У мазкур ҳафтада давлат раҳбари иштирок этадиган халқаро тадбирлар ҳақида маълумот берди, дея хабар қилмоқда «Дарё» мухбири.

Фото: «Дарё»

Фото: «Дарё»

Асадовнинг таъкидлашича, Венгрия бош вазири Виктор Орбан бошчилигидаги делегациясининг Шавкат Мирзиёев билан учрашуви 30 март, сешанба куни Кўксаройда бўлиб ўтади. Музокараларда икки мамлакат ўртасидаги сиёсий, савдо-иқтисодий, инвестициявий, молиявий-техник ва маданий-гуманитар ҳамкорликни ривожлантириш масалалари муҳокама қилинади.

«Венгрия Ўзбекистоннинг Европа Иттифоқидаги энг яқин ҳамкорларидан бири бўлиб, мамлакатларимиз кўп қиррали амалий шерикликни йўлга қўйган ва турли даражаларда фаол мулоқот қилиб келмоқда.

Хусусан, савдо-иқтисодий алоқалар ҳақида гапирганда, сўнгги тўрт йилда икки мамлакат ўртасидаги савдо айланмаси деярли уч баробарга ўсган. Мураккаб пандемия шароитига қарамай, ўтган йили ҳам ҳамкорлик самарали бўлиб, товар айирбошлаш ҳажми кўпайган», — деди Президент матбуот котиби.

Фото: «Дарё»

Фото: «Дарё»

Унинг қўшимча қилишича, ташрифдан асосий мақсад – товар айирбошлаш ҳажмини янада ошириш.

«Турли соҳаларда, жумладан, қайта ишлаш саноати, қишлоқ хўжалиги, сув хўжалиги, фармацевтика, туризм йўналишларида ҳали фойдаланилмаган жуда катта имкониятлар бор. Шу боис ҳам бугун Тошкентда икки мамлакат ишбилармонлар кенгашининг биринчи мажлиси бўлиб ўтмоқда. Хусусан, унда Венгриянинг ОТП-Банк, Эксимбанк, ‘Gedeon Rixter’, ‘Xunbas’, ‘Vitafort’, ‘Meditop’, ‘Xevesh-gep’ каби 40 дан зиёд йирик компания ва молиявий тузилмалари раҳбарлари қатнашиб, ўзаро манфаатли лойиҳаларни ишлаб чиқмоқда.

Бундан ташқари, Самарқанд ва Жиззах вилоятларида иқтисодий ва ижтимоий соҳаларни модернизация қилиш, хусусан, қишлоқ хўжалигини саноатлаштириш, экспорт салоҳиятини ошириш борасида Венгрия тажрибасини қўллаш мўлжалланган. Шу мақсадда Венгриядан юқори малакали экспертлар гуруҳи ҳам келган», — деди Шерзод Асадов.

Фото: «Дарё»

Фото: «Дарё»

Брифингда маълум қилинишича, ташриф доирасида иқтисодиёт, энергетика, таълим, маданият, ҳудудлараро ҳамкорлик, бандлик масалалари бўйича 10 га яқин ҳужжат имзоланиши кутилмоқда. 31 март куни якунланадиган ташриф давомида Виктор Орбаннинг илмий-тадқиқот ва тарихий объектлар билан танишиши ҳам режалаштирилган.

Фото: «Дарё»

Фото: «Дарё»

Тадбир мобайнида Шерзод Асадов 31 март, чоршанба куни Қозоғистоннинг Туркистон шаҳрида бўлиб ўтиши кўзда тутилаётган Туркий тилли давлатлар ҳамкорлик кенгашининг норасмий саммити тўғрисида ҳам сўз юритди.

«Тадбирнинг формати ўзгарди. Бутун дунёда эпидемиологик вазият туфайли анжуманни видеоконференция тарзида ўтказишга қарор қилинган. Ўзбекистон Президенти Шавкат Мирзиёев ҳам ушбу саммитда иштирок этади ва нутқ сўзлайди.

Саммитда давлат раҳбарлари Туркий кенгашнинг 2020–2025 йилларга мўлжалланган стратегияси ва бошқа ҳужжатларни муҳокама қилиши режалаштирилган. Саммит якунида Туркий тилли давлатлар ҳамкорлик кенгашининг Туркистон декларацияси қабул қилиниши кўзда тутилган», — деди Президент Админстрацияси раҳбарининг ўринбосари.

Шерзод Асадовнинг қайд этишича, Шавкат Мирзиёев фаолияти ҳақида доимий тарзда брифинг ўтказиб борилади.

Изоҳ
Асосий янгиликлар