«Авто 60 ой» МЧЖ масъулларига нисбатан жиноят ишини кўриб чиқиш бўйича очиқ суд жараёни ниҳоясига етди ва 29 март куни суд ҳукми эълон қилинди.
Ушбу жиноят иши жиноят ишлари бўйича Чилонзор туман суди судьяси Д. Валиев томонидан кўриб чиқилган. Эълон қилинган суд ҳукмига кўра:
- Ж. Баҳодиров («Авто 60 ой» МЧЖ раҳбари)га узил-кесил ўташ учун 8 йил муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди.
- О. Мирзаевга узил-кесил ўташ учун 7 йил муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди.
- Э. Қурбонов («Авто 60 ой» МЧЖ бош ҳисобчиси)га узил-кесил ўташ учун 6 йил муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди.
- М. Гулмирзаевага 5 йил муддатга озодликни чеклаш жазоси тайинланди. М. Гулмирзаевага Жиноят кодексининг 62-моддаси (ушлаб туриш, қамоққа олиш ёки уй қамоғи вақтини ҳисобга олиш қоидалари) тартибида, 2019 йил 7 ноябрдан 20 ноябрга қадар дастлабки қамоқда сақланган 14 кун муддатини озодликдан чеклашнинг бир кунига тенглаштириб ҳисобга олган ҳолда ўташ учун узил-кесил 4 йил 11 ой 16 кун муддатга озодликни чеклаш жазоси қолдирилди.
- М. Ҳакимова («Авто 60 ой» МЧЖ маслаҳатчиси) жазодан озод қилинди.
Эслатиб ўтамиз, «Авто 60 ой» МЧЖнинг мансабдор шахслари ва бошқаларга нисбатан 2019 йил 12 октябрь куни Жиноят кодексининг 188-1-моддаси 1-қисми (пул маблағларини ва (ёки) бошқа мол-мулкни жалб этишга доир ноқонуний фаолият) билан жиноят иши қўзғатилган эди.
Тергов жараёнида Ж. Баҳодиров ўзининг жиноий шериклари билан олдиндан тил бириктириб, бир гуруҳ бўлиб, «Авто олтмиш ой» ва Catalea Media МЧЖ ва ЯТТ «Ж.Баходиров»ни ташкил этиб, 3 ой муддат ичида Ўзбекистонда UzAuto Motors АЖ томонидан ишлаб чиқарилган автомашиналарни етказиб беришни ваъда қилиб, автомашина русумига қараб, 1 миллион сўмдан 10 миллион сўмгача бўлган миқдорда пул олиб, маблағларни қўлга киритгани аниқланган.
Жиноят иши бўйича «Авто 60 ой» МЧЖ бош офисидан олинган бухгалтерия ҳужжатларидаги маълумотлар бўйича 19 344 дан ортиқ шахслар билан шартномалар тузганлиги аниқланган ва ушбу шартномалар жиноят ишига қўшилган. Тергов ҳаракатлари давомида жами етказилган моддий зарар 47,7 миллиард сўм экани аниқланиб, шундан 36,8 миллиард сўм ундирилган.
Изоҳ (0)