Тошкент вилояти Зангиота туманидаги хонадонда босқинчилик қилган шахс қўлга олинди, дея хабар бермоқда Тергов департаменти.
Қайд этилишича, 2021 йилнинг 20 март куни соат 01:30 дан 02:00 гача бўлган вақт оралиғида номаълум шахс юзига тиббий ниқоб тақиб, темирдан ясалган қўлбола ўроқ билан қуролланган ҳолда Зангиота туманидаги «Боғзор» маҳалласида яшовчи 31 ёшли Ф.Х.нинг яшаш хонадонига кирган.
Босқинчи Ф.Х. ва унинг турмуш ўртоғи 28 ёшли Ш.Х.нинг ухлаб ётганидан фойдаланиб, ўроқ билан уларнинг бош қисмига уриб, оёқ ва қўлларини боғлаган. Жиноятчи хонадонда бўлган тилла-тақинчоқлар, турли русумдаги телефон аппаратлари, 1 000 000 сўм пул ҳамда Ф.Х.га тегишли нархи 6700 долларлик Spark автомашинасини босқинчилик йўли билан қўлга киритиб, жабрланувчиларга жами 83 250 000 сўм миқдорида моддий зарар етказган.
Мазкур автоуловда ҳодиса жойидан номаълум томонга яширинган.
Мазкур ҳолат юзасидан Тошкент вилояти ИИББ бошқармаси ҳузуридаги Тергов бошқармаси томонидан Жиноят кодексининг 164-моддаси 3-қисми «в» банди (уй-жойга ғайриқонуний равишда кирган ҳолда содир этилган босқинчилик) билан жиноят иши қўзғатилган.
Олиб борилган тезкор тергов ҳаракатлари давомида Юқори Чирчиқ туман «Ийк ота» маҳалласи ҳудудидан Ф.Х.га тегишли Spark русумли автомашина давлат белгилари ечилган ҳолда топилиб, ушбу жиноятни 33 ёшли Л.М. содир этгани аниқланган. Л.М. ашёвий далиллар билан ушланган.
Ҳозирда тергов ҳаракатлари олиб борилмоқда.
Маълумот учун, бу турдаги жиноятлар учун Жиноят кодексининг нормаларига кўра 10 йилдан 15 йилгача озодликдан маҳрум қилиш жазоси тайинланади.
Бундан аввал Зангиотада 19 ёшли қизни кимсасиз жойга олиб бориб, уни тирноқ олувчи «кусачка» билан қўрқитиб, телефон ва тақинчоқларини ўмарган ҳайдовчи ушлангани, Тошкент вилоятида 22 ёшли йигит 60 ёшли ҳайдовчининг Matiz’ини «запчаст»га сотиш учун унга 42 марта пичоқ уриб ўлдиргани ҳамда Андижонда ҳомиладор аёлга электрошокер ишлатиб, унинг тилла тақинчоқларини ўғирлаб кетган йигит ушлангани ҳақида хабар берилганди.
Изоҳ (0)