Zangiotada uxlab yotgan er-xotinga o‘roq bilan jarohat yetkazib, xonadondan mashina va boshqa buyumlarni o‘g‘irlab ketgan shaxs ushlandi

Toshkent viloyati Zangiota tumanidagi xonadonda bosqinchilik qilgan shaxs qo‘lga olindi, deya xabar bermoqda Tergov departamenti.

Qayd etilishicha, 2021-yilning 20-mart kuni soat 01:30 dan 02:00 gacha bo‘lgan vaqt oralig‘ida noma’lum shaxs yuziga tibbiy niqob taqib, temirdan yasalgan qo‘lbola o‘roq bilan qurollangan holda Zangiota tumanidagi “Bog‘zor” mahallasida yashovchi 31 yoshli F.X.ning yashash xonadoniga kirgan.

Bosqinchi F.X. va uning turmush o‘rtog‘i 28 yoshli Sh.X.ning uxlab yotganidan foydalanib, o‘roq bilan ularning bosh qismiga urib, oyoq va qo‘llarini bog‘lagan. Jinoyatchi xonadonda bo‘lgan tilla-taqinchoqlar, turli rusumdagi telefon apparatlari, 1 000 000 so‘m pul hamda F.X.ga tegishli narxi 6700 dollarlik Spark avtomashinasini bosqinchilik yo‘li bilan qo‘lga kiritib, jabrlanuvchilarga jami 83 250 000 so‘m miqdorida moddiy zarar yetkazgan.

Mazkur avtoulovda hodisa joyidan noma’lum tomonga yashiringan.

Mazkur holat yuzasidan Toshkent viloyati IIBB boshqarmasi huzuridagi Tergov boshqarmasi tomonidan Jinoyat kodeksining 164-moddasi 3-qismi “v” bandi (uy-joyga g‘ayriqonuniy ravishda kirgan holda sodir etilgan bosqinchilik) bilan jinoyat ishi qo‘zg‘atilgan.

Olib borilgan tezkor tergov harakatlari davomida Yuqori Chirchiq tuman “Iyk ota” mahallasi hududidan F.X.ga tegishli Spark rusumli avtomashina davlat belgilari yechilgan holda topilib, ushbu jinoyatni 33 yoshli L.M. sodir etgani aniqlangan. L.M. ashyoviy dalillar bilan ushlangan.

Hozirda tergov harakatlari olib borilmoqda.

Ma’lumot uchun, bu turdagi jinoyatlar uchun Jinoyat kodeksining normalariga ko‘ra 10 yildan 15 yilgacha ozodlikdan mahrum qilish jazosi tayinlanadi.

Bundan avval Zangiotada 19 yoshli qizni kimsasiz joyga olib borib, uni tirnoq oluvchi “kusachka” bilan qo‘rqitib, telefon va taqinchoqlarini o‘margan haydovchi ushlangani, Toshkent viloyatida 22 yoshli yigit 60 yoshli haydovchining Matiz’ini “zapchast”ga sotish uchun unga 42 marta pichoq urib o‘ldirgani hamda Andijonda homilador ayolga elektroshoker ishlatib, uning tilla taqinchoqlarini o‘g‘irlab ketgan yigit ushlangani haqida xabar berilgandi.