Фарғона шаҳрида яшовчи йигит қайлиғининг оиласи билан доимий жанжаллашиб келган аёлнинг уйини ёқиб юборди, дея хабар бермоқда Тергов департаменти.
Маълум қилинишича, 2021 йилнинг 12 март кунидан 13 март кунига ўтар кечаси номаълум шахс шаҳарнинг Фарғона кўчасида жойлашган кўп қаватли уйда яшовчи 48 ёшли аёл Т.В. ва 32 ёшли йигит Ш.А.га тегишли хонадонларнинг кириш эшиги ва деразасининг олдини ёнувчи суюқлик ёрдамида ёқиб юборган ва ҳодиса жойидан яширинган.
Олиб борилган терговга қадар текширув ҳаракатлари давомида 23 ёшли йигит Ш.Т. қайлиғининг оиласи билан Т.В. доимий равишда уриш-жанжал қилиб келганлиги сабабли уларни қўрқитиб қўйиш мақсадида мазкур жиноятга қўл ургани аниқланган.
Ушбу ҳолат юзасидан Фарғона шаҳри бўйича Ички ишлар органлари фаолиятини мувофиқлаштириш бошқармаси ҳузуридаги тергов бўлими томонидан Жиноят кодексининг 173-моддаси 2-қисми «б» банди (мулкни қасддан нобуд қилиш ёки унга зарар етказиш) билан жиноят иши қўзғатилиб, Ш.Т. гумон қилинувчи тариқасида жалб қилинган.
Бундан аввал Фарғонада унаштируви бекор қилингани сабаб севган қизининг уйини ёқиб юборган йигит уч йилга қамалгани, Жиззахда маст ҳолатда шеригини ўлдириб, унинг мурдасини ёқиб юборган икки эркак қўлга олингани ҳамда Наманганда алимент талаб қилинганидан дарғазаб куёв собиқ қайнотасини ўлдириб, уйини ёқиб юборгани ҳақида хабар қилинганди.
Изоҳ (0)