Қорақалпоғистоннинг Тахиатош туманида ЙҲХБ инспекторига пора берган ҳайдовчига нисбатан жиноят иши қўзғатилди, дея хабар бермоқда Бош прокуратура ҳузуридаги Департамент матбуот хизмати.
Маълум қилинишича, Департаментнинг Тахиатош туман бўлими томонидан ИИБ ходимлари билан ҳамкорликда тезкор тадбир ўтказилган. Тадбирда фуқаро А.Ю. ўзига тегишли автотранспорт воситасини маст ҳолда бошқарганлиги юзасидан тузилган баённомада таниши И.И.ни ҳуқуқбузар деб кўрсатишни таклиф қилиб, эвазига ЙҲХБ катта инспектори А.Б.га 6 миллион сўм пора берган вақтида ашёвий далиллар билан ушланган.
Мазкур ҳолат юзасидан А.Й.га нисбатан Жиноят кодексининг 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Бундан аввал Чирчиқда 4 минг доллар эвазига ўқишга киритиб қўйишни ваъда қилган кафедра мудири ушлангани, Андижонда 6 гектар ерни 18 минг долларга сотмоқчи бўлган фермер хўжалиги раҳбарига жиноят иши қўзғатилгани ҳамда Тошкентда халқаро автобуслар қатновини йўлга қўйиб беришни ваъда қилиб, 5 минг доллар пора олган МЧЖ масъули ушлангани ҳақида хабар берилганди.
Изоҳ (0)