Нурсултон Назарбоев неварасининг ўлими сабаби маълум қилинди

Қозоғистон собиқ президенти Нурсултон Назарбоевнинг невараси Ойсултон Назарбоев ўтган йили Британия пойтахтида кокаинга қарамлик оқибатида юзага келган табиий сабабларга кўра вафот этган. Ғарбий Лондон коронери Фиона Уилкокс шундай хулосага келган. Бу ҳақда Назарбоевлар оиласининг Британиядаги вакили маълум қилди, деб ёзади «РБК».

Ҳуқуқ-тартибот органлари гувоҳлар, полиция ва психиатр кўрсатмаларига таянган ҳолда, собиқ президент неварасининг ўлими ғайритабиийлик нуқтаи назаридан шубҳа уйғотмаслиги ва наркотиклар билан боғлиқлиги ҳақидагу хулосага келган.

«Биз сўнгги олти ой мобайнида катта кўмак берганларнинг барчасига ва текширувни муносиб олиб борган коронерга миннатдорлик билдирамиз. Биз шундай қийин вақтда махфийликни сўраб қоламиз», — дейилади оиланинг баёнотида.

Қозоғистон биринчи президенти Нурсултон Назарбоевнинг невараси Ойсултон Назарбоев 16 августга ўтар кечаси Лондонда 29 ёшида вафот этган эди. Ўшанда дастлабки тахминларга таянган ҳолда, унинг юраги тўхташи оқибатида ўлим юз бергани айтилган эди.

Ойсултон Назарбоев Дариға Назарбоева ва Раҳат Алиевнинг ўғли эди. У 1990 йил 26 августда туғилган. Унинг отаси Раҳат Алиев 2015 йилда Венадаги қамоқхонада ўлик ҳолда топилганди.

Ойсултон Британиянинг Қироллик ҳарбий академиясини ва Қозоғистондаги КИМЕП университетининг магистратура босқичини тамомлаган. У Қозоғистон Мудофаа вазирлигининг бош разведка бошқармасида хизмат қилган. Футбол билан шуғулланган ҳамда Қозоғистон ва хорижнинг бир неча клубида, жумладан, «Портсмут»нинг ёшлар жамоасида ўйнаган. Қозоғистон футбол федерациясида вице-президент лавозимида ишлаган.

2019 йилда Ойсултон Лондонда ўз жонига қасд қилишга уринганида уни тўхтатиб қолган полиция ходимини тишлаб олганди. Бу ҳаракати учун суд унга 1,5 йил муддатга шартли жазо берганди.

Ойсултон Назарбоев 2020 йил февралида ижтимоий тармоқдаги саҳифаси орқали Буюк Британиядан сиёсий бошпана беришни сўраган ҳамда Россия ва Қозоғистон ҳукуматлари ўртасидаги йирик кўламли коррупция ва халқдан ўғирланган миллиардлаб долларлар ҳақидаги маълумотга эга экани ҳақида ёзганди.

Коронер — баъзи мамлакатларда ноодатий ҳолатда ва тўсатдан юз берган ўлимни махсус текшириб, ўлим сабабини аниқловчи амалдор.