Шимолий Корея иккита тактик ракетанинг муваффақиятли синовлари ҳақида маълум қилди

Шимолий Корея иккита янги бошқарилувчи тактик ракеталарни синовдан ўтказганини маълум қилди, деб ёзади «РБК».

Синовлар 25 март куни бўлиб ўтган. Кореялик ҳарбийлар хабарига кўра, иккала ракета ҳам КХДР шарқий қирғоқларидан 60 километр масофада жойлашган нишонга муваффақиятли бориб теккан. Муваффақиятли парвоз ҳақида давлат раҳбари Ким Чен Ин хабардор қилинган.

Ҳарбийлар қайд этишича, яқинда ишлаб чиқилган ракеталар оғирлиги 2,5 тоннагача бўлган ядровий жанговар каллакларни ташишга қодир.

КХДР 25 март куни Япон денгизига қарата иккита баллистик ракетани учирди. Ракета синовлари ҳақида Япония Мудофаа вазирлиги ва Жанубий Корея ҳарбийлари маълум қилди. Бунгача эса АҚШ ҳарбийлари Пхенян тез орада баллистик ракеталар учиришни қайта бошлаши ҳақида огоҳлантирган эди.

Кейинроқ Америка президенти Жо Байден кескинлик кучайган тақдирда, Вашингтон Шимолий Кореянинг ракета синовларига жавоб қайтаришини ваъда қилди.

Аввалроқ Оқ уй февраль ўрталаридан буён бир нечта дипломатик каналлар, шу жумладан, Нью-Йоркдаги каналлар орқали Пхенян билан боғланишга уриниб келгани, аммо Шимолий Корея раҳбарияти бу уринишларни эътиборсиз қолдирганини айтган эди.

Шимолий Корея ҳукумати эса Вашингтон Пхенянга нисбатан душманлик сиёсатидан воз кечмагунча АҚШнинг янги маъмурияти билан алоқа ўрнатмаслигини айтди. КХДР ташқи ишлар вазири ўринбосарининг таъкидлашича, Пхенян ва Вашингтон ўртасидаги мулоқот «бир столда тенг ҳуқуқли ўтириб, фикр алмашиш» муҳитини талаб қилади.