Nazarboyev nevarasining “ko‘p millionli korrupsiya” haqidagi gaplari Qozog‘istonga nisbatan bosim ekani aytildi

Qozog‘istonning birinchi prezidenti Nursulton Nazarboyevning nevarasi Oysultonning Facebook’dagi postlari muayyan shaxslarning ta’siri ostida yozilgan va bu mamlakatga to‘g‘ridan to‘g‘ri bosim o‘tkazish, degan Axborot va jamiyat taraqqiyoti vaziri Dauren Abayev. Bu haqda “Kommersant” xabar qildi.

Avvalroq Oysulton Nazarboyev ijtimoiy tarmoqdagi sahifasi orqali Buyuk Britaniyadan siyosiy boshpana berishni so‘ragan va Rossiya va Qozog‘iston hukumatlari o‘rtasidagi yirik ko‘lamli korrupsiya va xalqdan o‘g‘irlangan milliardlab dollarlar haqidagi ma’lumotga ega ekani haqida yozgandi.

29 yoshli Oysulton Nazarboyev — Qozog‘iston birinchi prezidentining to‘ng‘ich qizi Darig‘a Nazarboyeva va Rahat Aliyevning o‘g‘li. U Britaniyaning Sandxerst qirollik harbiy akademiyasini tamomlagan va Qozog‘iston bosh razvedka mudofaa boshqarmasiga ishga olingandi.

“Men giyohvandlikka berilgan odamning gaplaridan iqtibos keltirish, u gaplarga asoslanib nimadir aytish va uni muhokama qilish odobdan emas deb hisoblayman. Ushbu holatda uning ochiqchasiga gapirayotgani emas, balki sog‘lig‘i bilan bog‘liq vaziyat xavotir uyg‘otadi. U Facebook’da yozgan postlar kimlarningdir ta’siri ostida e’lon qilingan deb hisoblayman”,— deya ushbu vaziyatga izoh bergan “Xabar” telekanali efirida Qozog‘iston vaziri.

Abayev Nursulton Nazarboyevning nevarasi giyohvand moddalar iste’mol qilishga mukkasidan ketganini va shu sababli uning bu kabi fikrlarini jiddiy qabul qilishga asos yo‘qligini qayd etgan.

“Hozir sodir bo‘layotgan hodisa – undan g‘araz maqsadlarda foydalanish va mamlakatimizga bosim o‘tkazish, iflos o‘yin”,— degan vazir.

Oysulton Nazarboyev “ko‘p millionli korrupsiya” haqidagi ma’lumotlarni Britaniyaning The Times nashriga bergan intervyusida oshkor etishini bildirgan. Yigit intervyuning qachon e’lon qilinishi haqida aniq ma’lumot bermagan. Bir oy avval Oysulton Facebook’dagi sahifasida Nursulton Nazarboyevning nevarasi emas, balki o‘g‘li ekani haqida post qoldirgandi.

Bir necha oy ilgari esa Oysulton Nazarboyev begona shaxsning mulki hisoblangan uyga bostirib kirgani va politsiyachi bilan mushtlashgani uchun London sudi tomonidan bir yil muddatga ozodlikdan mahrum qilingan. Sud qaroriga ko‘ra u ushbu muddat ichida giyohvand moddalarga qaramlikdan ham davolanishi belgilangandi.