Ўзбекистон Президентининг «Кексалар ва ногиронлиги бўлган шахсларни ижтимоий қўллаб-қувватлаш, саховат ва мурувват интернат уйлари тизимини янада ривожлантириш тўғрисида»ги фармони қабул қилинди. Бу ҳақда «Халқ сўзи online» хабар қилди.
Кексалар ва ногиронлиги бўлган шахсларни давлат томонидан ижтимоий қўллаб-қувватлаш тизимини янада такомиллаштириш, ижтимоий ҳимоя ва тиббий-ижтимоий ёрдамнинг замонавий механизмларини амалга оширишда янги ёндашувларни жорий этиш мақсадида Соғлиқни сақлаш вазирлиги ҳузуридаги Тиббий-ижтимоий хизматлар агентлиги ва унинг ҳудудий бўлинмалари негизида Ўзбекистон Тиббий-ижтимоий хизматларни ривожлантириш агентлиги ва унинг ҳудудий бўлинмалари ташкил этилади.
Белгиланишича, агентлик кексалар, ногиронлиги бўлган шахслар ва аҳолининг ижтимоий ҳимояга муҳтож бошқа тоифаларига тиббий-ижтимоий хизматлар кўрсатиш соҳасида ваколатли давлат бошқаруви органи ҳисобланади.
Шунингдек, агентлик ўз фаолиятида Вазирлар Маҳкамасига бўйсунади ва ҳисобот беради.
Агентлик директори ва унинг ўринбосарлари Ўзбекистон Президенти билан келишилган ҳолда Вазирлар Маҳкамаси томонидан лавозимга тайинланади ва лавозимдан озод этилади.
Бундан аввал Ўзбекистонда Зўрлик ҳамда ўз жонига қасд қилишнинг олдини олиш маркази, Қашқадарё ва Сурхондарёда Педагогика институтлари ҳамда Ўзбекистонда фирмаларга давлат тилида ном бериш хизмати ташкил этилиши ҳақида хабар берилганди.
Изоҳ (0)