Андижон вилоятининг Балиқчи туманида сабзавотчиликка ихтисослашган ер майдонини 18 минг долларга сотмоқчи бўлган фермер хўжалиги раҳбари ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти маълум қилди.
Маълум бўлишича, «Н.» фермер хўжалиги раҳбари Х.Р. Ф.Т.нинг ишончига кириб, унга фермер хўжалигига тегишли сабзавотчиликка ихтисослашган ер майдонининг 6 гектарини юқори лавозимда ишловчи танишлари орқали боғдорчилик йўналиши бўйича ҳужжатларни 18 минг доллар эвазига расмийлаштириб беришни ваъда қилган.
Олдиндан келишилган пулдан 189 миллион сўмни фирибгарлик йўли билан олган вақтида департамент ҳамда ДХХнинг Балиқчи тумани бўлимлари томонидан ўтказилган тезкор тадбирда ашёвий далиллар билан ушланган.
Ҳолат юзасидан Х.Р.га нисбатан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Зангиотада суғориладиган ер майдонини ноқонуний сотиб юборган фермер хўжаликлари раҳбарларига нисбатан жиноят иши қўзғатилгани, Паркентда беш гектар ерни 1 миллион долларга сотмоқчи бўлган шахс ушлангани, Бухоро тумани ҳокимлиги захирасидаги ерни 23,5 минг долларга сотмоқчи бўлган шахс қўлга тушгани, Навоийда тадбиркорга тегишли ерни 150 минг долларга сотишга уринган шахс қўлга олингани ҳақида хабар берилган эди.
Изоҳ (0)