Зеленский Россиянинг жисмоний ва юридик шахсларига янги санкциялар киритди

Украина президенти Владимир Зеленский фармони билан Миллий хавфсизлик ва мудофаа кенгашининг россиялик жисмоний ва юридик шахсларга қарши санкциялар эълон қилиш қарори кучга кирди. Фармон давлат раҳбарининг сайтида эълон қилинди, деб ёзмоқда «РБК».

Гап активларни блоклаш, тижорий операцияларни чегаралаш, капитални Украина ҳудудидан олиб чиқиб кетишнинг олдини олиш, умумий истеъмолдаги телекоммуникация хизматлари ҳамда тармоқларидан фойдаланишни чеклаш ёки тўхтатиш ва бошқа чекловлар ҳақида кетмоқда.

Рўйхатга 23 нафар россиялик ва учта франциялик жисмоний шахс киритилган. Улар орасида Россия фуқаролари — сенатор Людмила Нарусова ва академик, Россия Фанлар академиясининг Федерал илмий-тадқиқот ижтимоий маркази директори Михаил Горшков ҳам бор.

Юридик шахслар рўйхатига эса Россиянинг 81 та ташкилоти киритилган. Шунингдек, баъзи ташкилотларга 2018 йилда киритилган санкциялар муддати яна уч йилга узайтирилди. Россиянинг «Gazeta.ru», «Utro.ru», «Lenta.ru» каби ОАВларига нисбатан ҳам санкция муддатлари узайтирилди. Бундан ташқари, Зеленский «ТВ-Новости», «Федералное агентство новостей» МЧЖ, шунингдек, «СМИ2» МЧЖ каби автоном нотижорат ташкилотларига нисбатан чеклов чораларини жорий қилди.

Аввалроқ Зеленский Россиянинг «Сбербанк» ва «Проминвестбанк» шўъба тизмларига киритилган санкциялар муддатини уч йилга узайтирган эди. Санкция пул маблағларини Украина ҳудудидан олиб чиқишни тақиқлайди. Биринчи марта мазкур санкциялар 2017 йилда киритилган эди. Ўшанда Украина ҳукумати мамлакатда фаолият юритаётган Россия давлат банкларининг бешта тузилмасига қарши санкциялар жорий қилган: Сбербанк ва ВТБ, «БМ Банк» (ВТБ таркибида), «Проминвестбанк» (ВЕБ шўъбаси) ва VS Bank («Сбербанк» шўъбаси). 2018 йил ВТБ банклар гуруҳи Украинадаги фаолиятини тўхтатди, «Сбербанк» эса VS Bank’ни сотиб юборди.

Аввалроқ Украина Миллий хавфсизлик ва мудофаа кенгаши (МХМК) томонидан Олий Рада депутати ва «Мухолифат платформа — Ҳаёт учун» партияси етакчиси, «Путиннинг отаси» номи билан танилган Виктор Медведчукка қарши санкциялар жорий қилингани ҳақида хабар берилган эди.