Ukraina prezidenti Vladimir Zelenskiy farmoni bilan Milliy xavfsizlik va mudofaa kengashining rossiyalik jismoniy va yuridik shaxslarga qarshi sanksiyalar e’lon qilish qarori kuchga kirdi. Farmon davlat rahbarining saytida e’lon qilindi, deb yozmoqda “RBK”.
Gap aktivlarni bloklash, tijoriy operatsiyalarni chegaralash, kapitalni Ukraina hududidan olib chiqib ketishning oldini olish, umumiy iste’moldagi telekommunikatsiya xizmatlari hamda tarmoqlaridan foydalanishni cheklash yoki to‘xtatish va boshqa cheklovlar haqida ketmoqda.
Ro‘yxatga 23 nafar rossiyalik va uchta fransiyalik jismoniy shaxs kiritilgan. Ular orasida Rossiya fuqarolari — senator Lyudmila Narusova va akademik, Rossiya Fanlar akademiyasining Federal ilmiy-tadqiqot ijtimoiy markazi direktori Mixail Gorshkov ham bor.
Yuridik shaxslar ro‘yxatiga esa Rossiyaning 81 ta tashkiloti kiritilgan. Shuningdek, ba’zi tashkilotlarga 2018-yilda kiritilgan sanksiyalar muddati yana uch yilga uzaytirildi. Rossiyaning “Gazeta.ru”, “Utro.ru”, “Lenta.ru” kabi OAVlariga nisbatan ham sanksiya muddatlari uzaytirildi. Bundan tashqari, Zelenskiy “TV-Novosti”, “Federalnoe agentstvo novostey” MChJ, shuningdek, “SMI2” MChJ kabi avtonom notijorat tashkilotlariga nisbatan cheklov choralarini joriy qildi.
Avvalroq Zelenskiy Rossiyaning “Sberbank” va “Prominvestbank” sho‘ba tizmlariga kiritilgan sanksiyalar muddatini uch yilga uzaytirgan edi. Sanksiya pul mablag‘larini Ukraina hududidan olib chiqishni taqiqlaydi. Birinchi marta mazkur sanksiyalar 2017-yilda kiritilgan edi. O‘shanda Ukraina hukumati mamlakatda faoliyat yuritayotgan Rossiya davlat banklarining beshta tuzilmasiga qarshi sanksiyalar joriy qilgan: Sberbank va VTB, “BM Bank” (VTB tarkibida), “Prominvestbank” (VEB sho‘basi) va VS Bank (“Sberbank” sho‘basi). 2018-yil VTB banklar guruhi Ukrainadagi faoliyatini to‘xtatdi, “Sberbank” esa VS Bank’ni sotib yubordi.
Avvalroq Ukraina Milliy xavfsizlik va mudofaa kengashi (MXMK) tomonidan Oliy Rada deputati va “Muxolifat platforma — Hayot uchun” partiyasi yetakchisi, “Putinning otasi” nomi bilan tanilgan Viktor Medvedchukka qarshi sanksiyalar joriy qilingani haqida xabar berilgan edi.
Izoh (0)