Россия президентининг жияни Роман Путин давлат раҳбари Владимир Путинни қўллаб-қувватлаш қўмитасини тузди. Бу ҳақда Роман Путиннинг матбуот хизматига таяниб, Meduza хабар берди.
«Ушбу Бутунроссия ташкилоти Россия президенти Владимир Путин томонидан олиб борилган ривожланиш курсини қўллаб-қувватловчи мамлакатнинг барча фуқароларини фаол ҳаётий позиция билан бирлаштиришга чақиради», — деди Роман Путиннинг вакиллари.
Янги ташкилот уй-жой коммунал хўжалиги, тиббиёт ва таълим соҳасида президент фармонларининг бажарилиши ва тартибга солиш ишларини назорат қилади ҳамда ёшлардаги ватанпарварлик ва спорт тарбияси билан шуғулланади. Путинни қўллаб-қувватлаш қўмитаси Россиянинг барча ҳудудларида ўз филиалини яратишни режалаштирмоқда.
Кремль Роман Путиннинг ташаббуси ҳақида ҳали изоҳ бермади.
Маълумот учун Роман Путин — президентнинг амакиваччаси Игор Путиннинг ўғли. У Федерал хавфсизлик хизматида ишлаган, 2012 йилдан Новосибирск вилояти губернаторининг кўнгилли маслаҳатчиси бўлган, аммо бир йил ўтиб ишдан бўшатилган. Роман Путин бир қанча компанияларга эгалик қилади. У 2013 йилдан бери Россия таэквондо федерациясининг ҳомийлик фондини бошқариб келмоқда.
2014 йилда Роман Путин Лондонда Putin Consulting Ltd компаниясига асос солган, аммо кейинчалик уни Россияда Putin Consulting МЧЖ сифатида қайта рўйхатдан ўтказган. «Ведомости» нашрининг ёзишича, компания ишбилармонларга тендерларга тайёргарлик кўриш ва керакли давлат шартномасини олишга ёрдам беради. Агар улар муваффақиятли бажарилса, компания тендер ҳажмининг 3 фоиздан 10 фоизгача қисмини олади.
Роман Путин нашрга берган интервьюсида фамилиянинг консалтинг бизнесидаги аҳамияти ҳақидаги саволга шундай жавоб берди: «Исм унчалик муҳиммас, аммо фамилия ҳамма нарсани ҳал қилади».
2020 йил март ойида Роман Путин президент тарафдорлари сиёсий партиясини тузиш режаларини эълон қилган. Июнь ойида у «Халқ коррупцияга қарши» партиясининг раҳбари этиб сайланди. Кўп ўтмай Адлия вазирлиги партияни кетма-кет етти йил сайловларда қатнашмагани сабабли тугатилишини талаб қилди, ноябрь ойида Олий суд вазирликнинг даъвосини қондирди. Декабрь ойида Роман Путин «Коррупциясиз Россия» партиясини тузди.
Аввалроқ Путиннинг жияни ўз бизнеси ва Навальнийга нисбатан ҳурмати ҳақида гапириб берган эди. У бизнесда анча камсуқум одам эканлигини айтиб, «биз олигархлар эмасмиз» деган. Шунингдек, инглиз тилидаги Wikipedia’да унга тегишли деб кўрсатилган яхта ва Калифорниядаги ер майдонини «Ғарбнинг гиж-гижлашлари» деб атаган.
Изоҳ (0)