Сўнгги бир кеча-кундузда юз берган коронавирус билан боғлиқ энг муҳим хабарлар — «Дарё» коронадайжестида.
Украинанинг Одесса вилоятида ҳарбий аёл коронавирусга қарши эмланганидан кейин вафот этди. ОАВларга кўра, у Covishield вакцинасини қабул қилган, бу Ҳиндистонда ишлаб чиқарилган AstraZeneca дорисидир. Украина президенти Владимир Зеленский эса аввалроқ вакцинадан кейин тромблар пайдо бўлиши ҳақидаги хабарларни ахборот ҳужуми деб атаган эди.
Ҳарбий хизматчи аёл хизматдан ташқари вақтда ҳушини йўқотган. Ҳарбий ва ноҳарбий шифокорлар унга ёрдам беришга уринган, аммо унинг ҳаётини сақлаб қола олмаган. Аёл 21 март куни эмланган. Таъкидланишича, ҳарбий хизматчи гипертоник касалликдан азоб чеккан.
«Strana.ua» нашрига кўра, аёл қон қуюлиб қолишидан вафот этган.
Молдовада ҳам AstraZeneca вакцинаси билан эмланган эркак икки кундан кейин вафот этган. Вакцинадан кейин бир кеча-кундуз давомида унда ҳеч қанақа иккиламчи таъсирлар қайд этилмаган. Бир суткадан кейин унинг қон босими кўтарилган. Эркакка ўткир коронар синдром ташхиси қўйилган, касалхонага олиб бориш пайтида аҳволи оғирлашган, уни қайта жонлантириш иложи бўлмаган. Дастлабки экспертизага кўра, ўлимга юрак-қон томир етишмовчилиги сабабчи бўлган.
Жаҳон соғлиқни сақлаш ташкилоти маълумотларига қараганда, COVID-19’га чалиниш бўйича янги ҳолатлар сўнгги бир ҳафтада аввалги 7 кунга нисбатан 8 фоизга, ўлимлар эса 3 фоизга кўпайган.
«Бутун дунёда коронавирус билан касалланиш ҳолатлари кетма-кет тўртинчи ҳафта ҳам ўсишда давом этди, сўнгги бир ҳафтада қарийб 3,3 миллионта янги ҳолат қайд этилди. Айни вақтда олти ҳафта давомида камайган ўлим ҳолатлари чўққига чиқди, 60 мингдан ортиқ одам вафот этди», — дейилади ЖССТ хабарида.
Вирусни юқтириш ҳолатларининг энг кўп ўсиши Жануби-Шарқий Осиёда кузатилди, у ерда бир ҳафтада касалланганлар сони 49 фоизга ошди.
Дунёда жами касалланиш ҳолатлари 122,5 миллионтага, ўлимлар эса 2,7 миллионтага етди.
Коронавируснинг янги штаммлари тарқалишда давом этмоқда. «Британча» штамм 125 та (бир ҳафтада яна 7 та мамлакатда аниқланган), «жанубий африкача» штамм — 75 та (+11), «бразилияча» штамм эса 41 та (+3) мамлакатда аниқланган.
Бельгиянинг Льеж шаҳрида коронавируснинг янги мутацияси аниқланди, Бельгияда тадқиқ қилинган коронавирусга чалиниш ҳолатларининг 4 фоизи шу штамм ҳиссасига тўғри келади.
Франциянинг Figaro газетаси ёзишича, янги штамм ўзини бошқаларига қараганда ўзгача тутмоқда. Одатда ДНК бўлаклари нусхалар томонидан йўқотилади. Бельгия вариантида эса, аксинча, кўплаб қўшимчаларни тўпламоқда.
Янги штаммнинг юқумлилик ва хавфлилик даражаси ҳозирча номаълум. У интенсив даволаниш бўлимларида эмас, амбулатор даволаниш бўлимидаги беморларда аниқланган. Унинг вакциналарга нисбатан барқарорлик даражаси ҳам аниқланганича йўқ.
Ушбу мутация Бельгияда январь ойида аниқланган, аммо у Африкадан, у ердан учиб келган йўловчилар билан бирга келган бўлиши ҳам мумкин.
Шунингдек:
- Нидерландияда умуммиллий карантин ҳукумат қарори билан 20 апрелгача узайтирилди. Бу мамлакатда эпидемиологик вазиятнинг қийинлашуви муносабати билан амалга оширилди. Бундан ташқари, ҳукумат нидерландияликларга 15 майга қадар мамлакат ҳудудидан чиқмасликни тавсия қилмоқда. Айни вақтда комендантлик соати қисқартирилиб, энди у маҳаллий вақт билан 21:00 да эмас, 22:00 да бошланади.
- Норвегияда полиция ўтган ой ўз туғилган кунини нишонлаб, карантин қоидаларини бузган бош вазир Эрне Солбергни сўроқ қилмоқда. Ҳуқуқ-тартибот органлари суриштирувни шу ҳафта якунламоқчи. Солберг 60 ёшини тоғ курортида нишонлаган. Унинг юбилейига 13 киши келган, ҳукумат фармони бўйича эса 10 кишидан ортиқ одам иштирокида тадбирлар ўтказишга рухсат берилмайди. Бош вазирнинг ўзи карантин қоидаларини бузгани учун узр сўради. У 1165 доллар жаримага тортилиши мумкин.
- коронавирусга қарши вакцинацияларнинг 76 фоизи бор-йўғи ўнта мамлакат ҳиссасига тўғри келади. Бой мамлакатларда ушбу дориларга талаб катталиги сабабли COVAX механизми орқали COVID-вакциналар етказиб берилиши хавф остида қолмоқда, деди ЖССТ раҳбари Тедрос Гебрейесус. Айни пайтгача 459 миллионта вакцинация амалга оширилган. COVAX механизми орқали эса 57 та давлат ва иқтисодиётга 32 миллиондан ортиқ дозада вакцина етказилган.
Изоҳ (0)