Шимолий Корея 21 март куни қанотли ракеталарни синовдан ўтказган. Бу ҳақда мамлакат Штаб бошлиқлари қўмитасининг Yonhap нашрига берган маълумотига таяниб, «РБК» хабар берди.
Хабарга кўра, Сариқ денгиз минтақасидан иккита ракета учирилган. Қўмита ракеталарнинг учирилишини реал вақт режимида кузатган.
The Washington Post газетасининг хабар беришича, Аввалроқ АҚШ Мудофаа вазирлиги вакиллари разведка маълумотлари Шимолий Кореянинг ракета синовларини режалаштираётгани ҳақида огоҳлантирган эди.
«Хабар қилинмаган ракета синовлари КХДР етакчиси Ким Чен Иннинг АҚШ президенти Жо Байденга бўлган биринчи тўғридан-тўғри даъвосини англатади, Ким Чен Иннинг ёрдамчилари КХДР томонидан ҳали ядро таҳдидига нисбатан муносабат билдирмаган эди», — дейилади газета хабарида.
Шу билан бирга АҚШ маъмурияти Шимолий Корея ўтказган қисқа масофага учадиган ракеталарнинг синовини кенг кўламли провокация деб ҳисобламаяпти. Бу ҳақда маъмурият вакилининг баёнотига таяниб, Америка ОАВ хабар берган.
Маъмурият вакили амалга оширилган синовлар БМТ Хавфсизлик Кенгашининг КХДР тўғрисидаги қарорларига зид эмаслигини қўшимча қилган ва уларни «нормал ҳарбий фаолият» деб атаган.
«Биз ҳамма синовларга ҳам омма олдида жавоб қайтаравермаймиз... Бу БМТ Хавфсизлик Кенгашининг қарорлари доирасига кирмайдиган тизим», — дейди маъмуриятнинг яна бир вакили.
Унинг қўшимча қилишича, АҚШнинг янги маъмурияти КХДР билан муносабатларни таҳлил қилишни якунлаш арафасида. АҚШ ҳукумати ўз хулосаларини келаси ҳафта миллий хавфсизлик бўйича маслаҳатчилар даврасида Япония ва Жанубий Корея билан муҳокама қилмоқчи.
«Шуни таъкидлашим керакки, биз ҳаракат қилдик ва бундан кейин ҳам ҳаракатда давом этамиз. Биз Жанубий Корея, Япония ва Хитой билан мувофиқликдаги бундай дипломатия барча манфаатдор томонларнинг манфаатларига жавоб беради, деб ўйлаймиз. Биз ҳақимизда музокаралар учун очиқ эмас, деган таассурот пайдо бўлишини истамаймиз», — деди расмийлардан бири.
Аввалроқ Оқ уй февраль ўрталаридан буён бир нечта дипломатик каналлар, шу жумладан, Нью-Йоркдаги каналлар орқали Пхенян билан боғланишга уриниб келгани, аммо Шимолий Корея раҳбарияти бу уринишларни эътиборсиз қолдирганини айтган эди.
Шимолий Корея ҳукумати эса Вашингтон Пхенянга нисбатан душманлик сиёсатидан воз кечмагунча АҚШнинг янги маъмурияти билан алоқа ўрнатмаслигини айтди. КХДР ташқи ишлар вазири ўринбосарининг таъкидлашича, Пхенян ва Вашингтон ўртасидаги мулоқот «бир столда тенг ҳуқуқли ўтириб, фикр алмашиш» муҳитини талаб қилади.
Изоҳ (0)