Кучли ёмғирлар оқибатида Австралиянинг шарқий қирғоқларида сўнгги 50 йил ичидаги энг йирик сув тошқини бошланди, деб ёзади «Korrespondent.net».
Янги Жанубий Уэльс штати бош вазири Глэдис Бережиклян маълум қилишича, вазият дастлаб кутилганидан ёмонроқ бўлиб чиқди.
«Кеча биз бундай ҳодиса 20 йилда бир марта юз берса керак, деб умид қилган эдик, аммо энди бу 50 йилда бир марта содир бўладиган ҳодисани эслатмоқда», — деди Бережиклян 21 март куни ўтказилган брифингда.
Сидней шаҳридаги баъзи туманлар аҳолисига ярим тунда ўз уйларини тарк этиш тавсия этилган эди, чунки тез ҳаракатланаётган сув оқимлари катта вайронагарчиликларни келтириб чиқармоқда. Мингга яқин одам эвакуацияда ёрдам сўраган, шунингдек, яна 4 минг одам ўз уйларини тарк этишига тўғри келиши мумкин. Авария хизматлари аллақачон зарар кўрган уйлар сонини аниқлаштирмоқда.
Штатдаги бир қанча йирик йўллар ёпилган, кўплаб мактаблар 21 март, душанба кунги дарсларни бекор қилди.
Метеорологлар жала яна бир неча кун давом этишини маълум қилди. Авария бригадалари ёмғир бошланган 18 март, пайшанба кунидан буён ёрдам сўраб мурожаат қилинган 6 мингга яқин чақирувларни қайд этди, шуларнинг 700 таси тўғридан-тўғри қутқарув ҳақидаги сўровлардир.
Фавқулодда об-ҳаво шароити бутун Янги Жанубий Уэльс бўйлаб COVID-19’га қарши вакцина етказиб бериш шароитларига ҳам таъсир ўтказди. Келаси ҳафта давомида деярли 6 минг кишига биринчи дозаларни етказиб бериш бўйича режалар бузилган.
Аввалроқ Австралияда Сидней шаҳридан ғарбдаги сув тошқинидан жабр кўрган туманлар аҳолиси эвакуация қилинаётгани хабар берилган эди. Янги Жанубий Уэльс ҳамда Сидней яқинидаги ғарбий туманларда дарёлар қирғоғидан тошиб чиқди. Сиднейдаги асосий сув манбаи — Варрагамба тўғонида эса 20 март куни сув тошиб чиқишни бошлади, бу Непин ва Хоксбери дарёларида сув сатҳи кўтарилишига олиб келди. Метеорология бюроси бутун штат бўйлаб дарёлар тошиши ҳақида огоҳлантирди.
Мавзуга доир:
Изоҳ (0)