Сурхондарё вилоятининг Термиз туманида автомобилларга автотураргоҳ қуриш учун давлат муҳофазасига олинган археологик ҳудуддан тупроқ қазиган тадбиркор ишини вилоят прокуратураси ўрганадиган бўлди. Бу ҳақда вилоят ҳокимлиги ахборот хизмати маълум қилди.
Маълум бўлишича, 2021 йилнинг 19 март куни ижтимоий тармоқларда «Сен ўтмишга тош отсанг, келажак сени замбаракдан ўққа тутади» сарлавҳали хабар эълон қилинган бўлиб, унда буюк аллома Варроқ Термизийнинг қабри ва унинг атрофи текисланаётгани, ҳудудда тадбиркор томонидан автомашиналар турар жойи қурилаётгани тилга олинган.
Мазкур хабарга муносабат билдирган Сурхондарё вилоят ҳокимлиги ахборот хизмати Термиз туманидаги «Қоратепа», «Фаёзтепа» «Термиз шоҳлар» саройи каби ўнлаб обидаларни қамраб олган «Эски Термиз» археологик ҳудуди 500 гектарлик майдонга эгалигини, ҳудуд Вазирлар Маҳкамаси қарори билан давлат муҳофазасига олинганини таъкидлаган.
«Археологик ҳудудни оператив бошқариш ҳуқуқи Термиз давлат музей-қўриқхонасига топширилган бўлиб, ҳудудда қурилиш, таъмирлаш, текислаш ва бошқа ишларни амалга ошириш қатъиян ман этилган. Милоддан аввалги IX-Х асрларда яшаб, фаолият кўрсатган улуғ аллома Абу Бакр Варроқ Термизий қабри ҳам ушбу археологик ёдгорлик ҳудудида жойлашган бўлиб, Марказий Осиё халқлари тарихида муҳим ўрин эгаллайди.
Аммо Термиз шаҳрида фаолият кўрсатаётган Complex Technical Services МЧЖга автотранспорт воситаларига техник хизмат кўрсатиш, автомобилларга сиқилган газ қуйиш компрессор станцияси ҳамда автотранспорт воситаларининг замонавий савдо мажмуаси қуриш учун Термиз тумани ‘Янгиобод’ маҳалласи ҳудудидаги туман захира фондидан 10 гектар яйлов ер майдони ажратилган.
2021 йилнинг 19 март куни олиб борилган ўрганишлар давомида ўзига ажратилган ер майдонида қурилиш ишларини амалга ошириш учун МЧЖ томонидан 100 метр узоқликда жойлашган муҳофаза ҳудуднинг чегара қисмидан ўзбошимчалик билан тупроқ қазиб олиш ишлари олиб борилаётгани аниқланди», — дейилади ҳокимлик ахборотида.
Вилоят ҳокимлиги ахборот хизматининг қўшимча қилишича, айни кунда «Эски Термиз» ҳудудидан тупроқ қазиб олиш ишлари тўхтатилган. Бироқ Варроқ Термизий мақбарасига туташ ёдгорликларга қисман зиён етган. Шу сабаб муҳофаза ҳудудида ноқонуний ишларни олиб боргани учун Complex Technical Services МЧЖга нисбатан ўрнатилган тартибда қонуний чора кўриш бўйича вилоят прокуратурасига ҳужжатлар тақдим этилган.
Изоҳ (0)