Самарқанд шаҳрида Россияга кетиш истагидаги ўнлаб меҳнат мигрантларига авиачипталар сезиларли даражада қиммат нархда сотилганига оид масалани ўрганаётган «Kun.uz» мухбирига таҳдид қилинди, деб хабар беради нашр.
Қайд этилишича, айни вақтда Россиядаги «Пик Индустрия», «Технострой» каби қурилиш ташкилотлари орқали Россияга ишлашга борган ватандошлар дуч келган муаммолар таҳририят томонидан ўрганилмоқда.
Ўрганишлар чоғида, меҳнат мигрантларига авиачипталар 4,5 миллион сўмдан сотилгани, чипталарни Самарқанд шаҳри, Гагарин кўчаси 47-уйда жойлашган «Пик Индустрия», «Технострой» каби ташкилотларнинг шартнома асосида Ўзбекистондаги ишончли вакили ҳисобланган «Панорама болалар уйи» МЧЖ сотгани ҳақида маълумотлар тўпланган.
Нашрнинг ушбу шаҳардаги ҳудудий офиси ходими Анвар Мустафоқулов шу йил 19 март куни мавжуд маълумотларга аниқлик киритиш мақсадида айрим саволлар билан фирма идорасига борган. Аммо мухбир у ерда фирманинг масъул ходимлари бўлиши мумкинлиги эҳтимол тутилаётган шахсларнинг таҳдидига учраган.
Мухбирнинг айтишича, дастлаб, ундан телефонни ўчириб туришни, вазият бўйича гаплашиб олишларини билдиришган, сўнгра турли ҳақоратли сўзлар билан ҳақоратлаб, ўлдириш билан таҳдид қилишган ва куч ишлатишга уринишлар бўлган. Вазият жиддийлиги ойдинлашгач, мухбир у ердан қочиб чиқишга муваффақ бўлган.
Журналист унга бўлган таҳдид юзасидан Самарқанд шаҳар ИИО ФМБга ариза киритган.
Самарқанд вилояти ИИБ ахборот хизматининг мазкур ҳолат юзасидан берган баёнотида қайд этилишича, журналист вилоят ИИБ бошлиғи номига ариза билан мурожаат қилиб, уларга нисбатан қонуний чора кўришни сўраган. «Ҳозирда ариза юзасидан, терговга қадар текширув ҳаракатлари олиб борилмоқда. Натижаси бўйича қўшимча маълумот берилади», — дейилади хабарда.
Эслатиб ўтамиз, 2019 йилда Олмазор туман ҳокими ўринбосари Абдурасул Ваҳобов «Kun.uz» ходимларига таҳдид қилганди. Орадан бир кун ўтиб Тошкент шаҳар ҳокимлиги матбуот хизмати томонидан Ваҳобовнинг видеоинтервьюси эълон қилинди ва унда ҳоким ўринбосари «Kun.uz» мухбири Раҳматилла Исроилов муқаддам ундан тамагирлик йўли билан ер талаб қилгани ва бунинг эвазига катта миқдорда пора таклиф этгани ҳақидаги даъвони илгари сурган эди.
Ушбу ҳолат юзасидан Ўзбекистон журналистлари ижодий уюшмаси, Тошкент шаҳар ҳокимлиги ҳамда Ахборот ва оммавий коммуникациялар агентлиги ўрганиш ўтказаётганини маълум қилди. Депутат Расул Кушербоев журналистларга қўпол муносабатда бўлган ҳоким ўринбосари ўз лавозимини тарк этиши кераклиги ҳақида фикр билдирганди.
Шундан сўнг туман ҳокими ўринбосари Абдурасул Ваҳобов 2019 йил сентябрида ишдан кетган, бироқ 2020 йилнинг ноябрида у лавозимига қайта тиклангани маълум бўлганди.
Изоҳ (0)