2021 йилнинг 25 апрель куни бўлиб ўтадиган «Оскар» мукофотининг 93-тақдирлаш маросими бир вақтнинг ўзида икки жойда бўлиб ўтади. Бу ҳақда Америка киноакадемияси раҳбари Дэвид Рубин маълум қилди, деб хабар бермоқда Glamour нашри.
Киноакадемия раҳбарининг маълум қилишича, тақдирлаш маросими — машҳур Dolby театри ва Лос-Анжелесдаги Union Station’да бўлиб ўтади. Бундан ташқари, маросимда фақат бошловчи ва номзодлар иштирок этади.
«Пандемия апрель ойигача тугайди, деб умид қилган эдик, — дейди Дэвид Рубин. — Бошловчилар ҳамда номзодларининг соғлиғи ва хавфсизлиги биз учун муҳим, шу сабабли бир қатор чоралар кўришга мажбур бўлдик».
Хабарда айтилишича, тадбир бир вақтнинг ўзида иккита жойда ўтказилишини инобатга олган ҳолда, маросим иштирокчилари ижтимоий масофани таъминлаш учун иккига бўлинади. Шунингдек, бу йил номзодлар учун ташкил этиладиган анъанавий нонушта ва губернаторлик бали ҳам бекор қилинган.
Аввалроқ 2020 йилнинг баҳорида Америка кинематография академияси «Оскар» тақдирлаш маросими қоидалари 2021 йилда ўзгаришини эълон қилган эди. Шундай қилиб биринчи марта фильм ва премьералар кинотеатрда эмас, балки платформаларда намойиш этилади. Аввалроқ коронавирус пандемияси туфайли 2020 йилнинг июнь ойида ташкилотчилар томонидан «Оскар—2021» тақдимоти 28 февралдан 25 апрель санасига кўчирилган.
Изоҳ (0)