Амир Хон ва Карина ўрнига Шоҳруҳ Хон ва Анушка Шарма: «Уч савдойи» фильми ҳақида қизиқарли маълумотлар

«Ҳаммаси яхши!» – фильм мухлисларининг севимли иборасига айланиб улгурган. «Уч савдойи»нинг ўзини эса томоша қилиб чарчамайдиган фильмлар сирасига киритиш мумкин.

Фильм ҳинд кинематографияси тарихида биринчи марта энг кўп маблағ тўплаган фильмга айланди.

Картина 2013 йил «Байкерлар 3» фильми намойиш этилгунига қадар барча даврлардаги энг кўп даромад келтирган ҳинд фильми рекордини ҳам ушлаб турди.

Шунингдек, Хитой ва Япония каби Шарқий Осиёда муваффақият қозонган ҳинд фильмларидан биридир.

«Уч савдойи» олтита Filmfare Awards, шу жумладан, учта «Миллий фильм», «Энг яхши машҳур фильм» каби мукофотларга сазовор бўлган. Хорижда эса Японияда бўлиб ўтган Videoyasan Awards танловининг бош совринига эга бўлган. Фильм ремейки ҳаттоки Мексикада ҳам суратга олинган.

Аммо ушбу фильмда ролга биринчи тасдиқланган актёрлар иштирок этмаган. Хабарларга кўра, Ражкумар Хирани фильм қаҳрамони учун  уч актёр – Шоҳрух Хон, Жон Абрахам ва Саиф Али Хонни танлаган.

Шоҳрух Хон учун Амир Хон гавдалантирган Ранчо образи таклиф этилган. Аммо актёр «Менинг исмим Хон» фильми учун режиссёрнинг таклифини рад этишига тўғри келди. Картинада ҳаттоки Санжай Датт ҳам эпизодик ролни ижро этиши керак бўлган. Аммо бу ҳам амалга ошмаган.

Аршад Варси эса Фархан Куреши ва Ражу Растоги роли учун тавсия этилган. Афсуски, актёр ҳам вақт масаласи туфайли ролларни рад этган. Бундан аввал Аршад ва Санжай Хиранининг «Муннабой» фильмида иштирок этган.

Бундан ташқари, Анушка Шарма фильмда роль ижро этиши учун синаб кўрилган, аммо роль Карина Капурга насиб этган. Кейинчалик Анушка Хирани билан «ПиКей» картинасида бирга ишлаган.