2021-yilning 25-aprel kuni bo‘lib o‘tadigan “Oskar” mukofotining 93-taqdirlash marosimi bir vaqtning o‘zida bir necha joylarda bo‘lib o‘tadi. Bu haqda Esquire xabar berdi.
Foto: Legion Media
“Dunyo tomoshabinlariga marosimni namoyish etish va pandemiyaga qarshi talablarga rioya qilish uchun taqdirlash marosimining efirga uzatilishi turli joylarda, jumladan, mashhur Dolby teatrida ham o‘tkaziladi”, — deydi Amerika kinematografiya akademiyasining vakili. Shuningdek, yaqin kunlarda batafsil ma’lumotlar taqdim etilishi ham ta’kidlangan. Marosim kim tomonidan olib borilishi hali ma’lum emas.
Qolaversa, 2021-yilning 9-fevral kuni Andrey Konchalovskiyning “Aziz o‘rtoqlar!” filmi “Oskar” mukofotining “Eng yaxshi xalqaro film” nominatsiyasi bo‘yicha ro‘yxatga kiritilgan. Bundan tashqari, mukofotga nomzodlar ro‘yxatida rossiyalik rejissor Viktor Kosakovsk tomonidan AQSh hamda Norvegiyada oq-qora formatda suratga olingan “Gunda” filmi ham bor. U “Eng yaxshi to‘liq metrajli hujjatli film” nominatsiyasida qatnashadi. Barcha nominatsiyalar 2021-yilning 15-mart kuni e’lon qilinadi.
2020-yilning bahorida Amerika kinematografiya akademiyasi “Oskar” taqdirlash marosimi qoidalari 2021-yilda o‘zgarishini e’lon qilgan edi. Shunday qilib, birinchi marta film va premyeralar kinoteatrda emas, balki platformalarda namoyish etiladi. Avvalroq koronavirus pandemiyasi tufayli 2020-yilning iyun oyida tashkilotchilar tomonidan “Oskar—2021” taqdimoti 28-fevraldan 25-aprel sanasiga ko‘chirilgan.
Xabarlarga ko‘ra, “Oltin globus” taqdirlash marosimi ham onlayn tarzda o‘tkaziladi. Los-Anjeles va Nyu-Yorkda bo‘lib o‘tishi rejalashtirilayotgan marosimni Tina Fey va Emi Poler olib boradi.
